DAKO nga kalampusan ang nahimo sa National Bureau of Investigation (NBI) 7 human nila matumbok ang mga gunman ug giingong “middleman” sa pagpatay kang manlalaban Joey Luis Wee. Ilang nasikop si retired Army Lieutenant Colonel Edwin Layese, kanhi regional director sa Philippine Drug Enforcement Agency (PDEA) 6.
Si Layese usab ang gitumbok nga mastermind sa suway nga pagpatay sa usa ka abogado nga gi-ambush sa miaging tuig, apan ni-survive. Napakita sa NBI ang ilang abilidad sa pag-imbestigar sa kaso nga mitikuluso tungod kay nakakuha sila og electronic nga mga ebidensya nga natukma sa mga pamahayag sa ilang mga saksi. Segurado silang naa na hapit tanang mga ebidensya alang sa lig-ong kaso nga ilang gi-file.
Nisuka pa sab ang usa sa mga giingong gunman hinungdan nga hapit na maporma ang tanang mga ebidensya aron matumbok kinsa ang nipapatay kang Wee. Kay kon tinuod nga si Layese ang nikuha sa serbisyo sa mga gunman, posible kaayo nga dunay nikuha sa serbisyo ni Layese.
Hinaut pang matumbok na ang tinud-anay nga mastermind aron hingpit nga masulbad ang kaso.
Kon ingon pa lang niini moimbestigar og krimen ang mga awtoridad, hayan hingpit nang mahibalik ang pagsalig sa katawhan ngadto sa mga awtoridad.
Nganong ang publiko di man magpakabana sa pagsaksi kon dunay krimen nga mahitabo? Kini tungod kay wa may nakita nga kalampusan sa pagsulbad sa mga pagpatay. Gidudahan pa man gani nga mga awtoridad ra usab ang nagpaluyo.
Hayan kon kanunay nga ingon niini ang dagan sa imbestigasyon bisan ordinaryong mga tawo ang gipatay, inanay nga mahibalik ang pagsalig sa publiko sa mga awtoridad. Kay kon way kooperasyon sa mga saksi sa mga krimen, kuli nga masulbad ang mga pagpatay. O di ba tapulan ug bulay-og lang ang mga imbestigador sa kapulisan?