Usa ka pintor ang gipusil-patay sa Sityo Santo Rosario sa Barangay Labangon, Siyudad sa Sugbo pasado alas 10 sa gabii sa Enero 16, 2021.
Ang pintor giila nga si Randy Salera, 40, ug molupyo sa Barangay Labangon.
Si Police Staff Sergeant Stephen Sefuesca sa Labangon Police Station 10 nagkanayon nga si Salera nag-inom duol sa ilang balay.
Matod pa, kalit lang giduol sa wala mailhi nga lalake si Salera ug walay daghang sulti, gipusil kini.
Si Salera, kinsa napusilan na, nakahimo sa pagdagan paingon sa sud sa ilang pinuy-anan, apan ang killer nigukod ug gisigehan siya og pusil hangtod nga didto na nahagba sulod sa gate sa ilang compound.
Dugang ni Sefuesca nga kaila ni Salera ang killer. Ang killer molupyo sa kasikbit nga sityo apan dili pa lang una nila ibutyag ang pangalan aron kon malutsan og warrant of arrest .
Si Salera dunay daghang samad nga pinusilan sa lawas.
Samtang gitutokan sa Labangon Police nga posibleng maoy motibo sa pagpatay mao ang bangi nga personal.
Dunay nadawat nga kasayuran ang kapulisan nga posibleng may kalabotan kini sa ilang grupo sa dapit.
Ang Scene of Crime Operatives (Soco) nakakuha og upat ka mga kabhang sa bala sa wala pa masuta nga kalibre sa armas. (BBT)