Gitulis ang usa ka dakong convenience store sa Barangay Babag, Dakbayan sa Lapu-Lapu, pasado alas 12:00 sa tungang gabii sa Enero 18.
Gibanabana nga P8,000 ang kuwartang nasakiyo sa tulisan.
Matod ni Police Major Jaime Tolentino, hepe sa Police Station 3 sa Lapu-Lapu City Police Office (LCPO), ang kahera sa 7-11 ang nitaho sa ilang buhatan nianang pasado alas 3:00 sa kaadlawon.
Ang 7-11 aduna untay gwardiya apan giingong wala kini makaposte sa tindahan atol sa pagpanulis kay nangape kini.
Sa inisyal nga pakisusi sa kapulisan wala pa silay matumbok nga responsable sa pagpanulis.
Apan base sa kuha sa Closed Circuit Television CCTV sa tindahan usa ka lalakeng naka-green hoodie ang misulod sa tindahan pasado alas 12:00 sa tungang gabii dayon hana og tion sa kahera og armas de fuego.
Tungod sa kahadlok gihatag sa cashier ang halin niadtong tungora ug dali usab mga nisibat ang tulisan.
Mangita pa og laing anggulo sa CCTV ang kapulisan hilabi na sa gawas ug palibot sa tindahan alang sa pag-ila sa nag-inusarang tulisan.
Gikatakdan usab nga pakighinabian sa kapulisan ang gwardiya sa tindahan isip kabahin sa ilang imbestigasyon.
Susihon usab nila nganong dugay mitaho sa kapulisan ang kahera sa tindahan.
“Mao pa nay amo tan-awon ngano na tulis nga duna man untay gwardiya pero mao lage timing kuno wala diha pagpanulis, unya dugay sad sila ni report sa police station,” matod ni Tolentino sa Superbalita Cebu. (GCM)