GIMANDUAN ni Mayor Edgardo Labella si Police Colonel Josefino Ligan sa Cebu City Police Office (CCPO) sa pagpasaka og kaso batok sa tagdumala sa imnanan duol sa I.T. Park nga namaligya og ilimnong makahubog atol sa piyesta sa Señor Sto. Niño niadtong Enero 17, 2020 diin nagdasok ang mga tawo.
Ang tagdumala sa The Park Social dunay live band entertainment samtang nag-inom ang mga tawo nga wala na masunod ang social distancing ug ubang health protocol.
Ang Cebu City Legal Office andam makigtambayayong ngadto sa CCPO para sa pagsang-at sa kaso ngadto sa piskaliya.
Si Ligan nipadayag na kagahapon nga mopasaka og sumbong aron ang gihimo.sa tagdumala sa maong restaurant bar makahatag og pagtulon-an ngadto sa uban aron dili na mohimo sa ingon samtang aduna pay pandemiya dala sa Covid-19.
Ang maong resto-bar nadiskobrihan sa mismo ni Ligan kinsa nipahigayon og roving niadtong gabii sa Enero 17, ilang nakita ang The Park Social sa barangay Lahug.
Matod ni Ligan nga ang tag-iya nangayo og pasaylo ngadto sa pulis apan gipadayag sa pangulo sa CCPO nga di na bag-o ang kampanya sa City Hall ug sa CCPO gani aduna pa silay programa nga Oplan Bulabog.
Ang estabilisimento, matod ni Ligan, makasilbi lang og 100 ka kustomer apan niadtong gabii sa piyesta sa Senyor, naobserbahan sa kapulisan nga kapin sa 500 ka mga tawo ang nasud. (PAC)