GI-CLAMP ug gi-tow sa taga Cebu City Transportation Office (CCTO) ang mga sakyanan ug motorsiklo nga gi-park sa bike lanes sa Dakbayan sa Sugbo Enero 18, 2021.
Matod ni Lyntoni Sable, officer-in-charge sa CCTO, 10 ka mga sakyanan ang na-clamp ug lima ka mga motorsiklo ang ilang gikarga gumikan sa kalapasan sa lagda sa trapiko.
Ang mga sakyanan gibiyaan sa mga driver sa dalan B. Rodrigez, V. Rama Avenue ug Osmeña Boulevard. Si Sable niawhag sa mga nagmaneho og sakyanan nga di mo-park sa bike lanes ug mga no stopping ug no parking areas sa siyudad.
Ang Department of Public Works and Highways nisugod na og pintal sa mga national roads alang sa bike lanes samtang ang Cebu City Government usab ang moangkon sa mga bike lanes nga molagbas sa mga city roads.
Adunay gibana-banang duha ka metros nga bike lanes ang gilinya sa DPWH 7 alang sa bicycle riders, apan mahimo usab kining gamiton sa mga motorsiklo ug four-wheeled vehicle kon way biseklita nga nagdagan nga maoy prayoridad niini. / PAC
Matangtangan sa clamp ang mga sakyanan kon sila makabayad sa traffic violation ug clamping violation balor og P1,500 sa motorsiklo ug P2,500 sa na-tow mga sakyanan.
Kon adunay pending violations, kinahanglan unahon kini og bayad, dugang ni Sable. (PAC)