TARGET sa National Bureau of Investigation (NBI) 7 ang pagdakop sa utok sa pagpatay ni manlalaban Joey Luis Wee.
Si NBI 7 Regional Director Renan Oliva niluwat ning pamahayag sa usa ka press conference Enero 18, 2021 human nila masikop niadtong Enero 13 sa Osmeña Boulevard, Dakbayan sa Sugbo si retired Army officer Lt. Colonel Edwin Layese, kinsa ilang gihulagway nga contractor o middleman sa pagpatay ni Wee.
Nagpasabot nga siya ang gi-contact aron pagkuha og killers ni Wee, kinsa gipatay Nobiyembre 23, 2020 dihang padung nang mosaka sa iyang buhatan sa J. Panis St., Barangay Kasambagan, Dakbayan sa Sugbo.
Gawas sa pagkuha sa serbisyo sa killers, siya usab ang ni-supervise sa operasyon hinungdan nga ang iyang sakyanan nakuha sa mga CCTV.
Matod ni Oliva nga ang mga cell phone nila ni Layese ug Benigno Peralta, gunman nga unang nadakpan sa Luzon, ila nang gipahiling alang sa electronic evidence.
Bisan pa niini, segurado na si Oliva sa kalig-on sa ilang kaso nga murder nga gipasaka batok kang Layese human nikumpisal kanila si Peralta, mga kuha close circuit television (CCTV) camera, documentary evidence ug mga saksi.
Wa man tuod motug-an og ngan si Oliva, apan siya niingon nga may kalambigitan sa usa sa mga kaso ang motibo sa pagpatay ni Wee.
Matod ni Oliva nga human nila makuha ang ngan ni Layese gikan ni Peralta, ni-apply dayon sila og search warrant ug gipangita. Ilang nakit-an si Layese sa midtown area sa Enero 13 sa kaadlawon.
“His vehicle was monitored somewhere near Fuente Osmena circle in one of the establishments there. And so, armed with that search warrant, we waited for him to approach his vehicle and as soon as he opened his vehicle, (we arrested him)” matod ni Attorney Arnel Pura.
Nakuha gikan kang Layese ang usa ka kalibre .40 nga pistola ug mga cellular phone nga magamit nga ebidensya.
Tinguha usab nila karon ang pagkuha sa ubang mga armas nga gigamit sa pagpatay.
UNSAY YAWE
Si Oliva niingon nga samtang sila nag-imbestigar sa kaso ni manlalaban James Joseph Gupana, kinsa nakalingkawas nga buhi sa ambush niadtong Oktubre 10, 2020, gipatay si Wee.
Base sa ilang nakuhang mga ebidensya sa pagpatay ni Wee, ilang nabantayan nga pupareho ang estilo sa gunman.
Ila na kining nakompirmar sa imbestigasyon.
“So during the investigation, there were already similarities of the execution and the personalities involved in both cases,” asoy ni Pura, kinsa nangu sa operasyon.
Si Peralta nibutyag sa NBI 7 nga sila gikontrata ni Layese og P400,000 sa pagpatay kang Wee samtang sa kang Gupana P150,000.
Ang motibo sa kang Gupana personal kay nasuko si Layese sa abogado.
Matod ni Oliva nga makita sa CCTV camera sa duha ka mga pagpamusil nga susama rag jacket ang gisuot sa gunman nga adunay marka sa luyo niini.
Sa mga kuha sa CCTV camera sa dapit diin gipusil patay si Wee, makita ang blue nga pick-up truck ni Layese ug Toyota Vios nga gisakyan sa mga gunman nga mao usab sa kaso ni Gupana.
NAGTAGBO
Human sa malampuson nga pagpatay sa abogado, nagkita sila si Layese ug Peralta sa managlahing mga dapit aron itahan ang bayad kanila.
“After the shooting, gihatag ang balance sa payment kuyog sila ni Peralta. Kuyog sila sa uban. They met pero gabalhin-balhin ni siya og addresses,” dugang ni Oliva.
Dugang ni Oliva nga ang mga gunman nalambigit na sa mga pagpatay sa mga abogado sa laing dapit sa nasud bugti sa suhol kanila.
Samtang si John Raphael Pelinggon, abogado ni Layese, nidalikyat sa buhatan sa NBI 7 aron unta pakighinabian ang iyang kliyente. Apan ang NBI-7 wala una gipaestorya kaniya ang iyang kliyente.
“My client has the right to be proven innocent until proven otherwise. So, at this moment, we will not give any comment. We will face the charges in due time,” matod ni Pelinggon. (dugang taho ni BBT)