GIDARO sa usa ka 10-wheleer truck ang poste ug usa ka awto human wa maka-brake ang drayber sa intersection sa Ouano Avenue ug C.D. Seno St., Mandaue City alas 10:45 sa buntag sa Enero 19, 2021.
Matod ni Alex Indab, drayber sa trak, nga wala mogana ang iyang preno ug wa siya makabantay nga stop na diay hinungdan nga nadaro ang awto nga anaa sa iyang atubangan.
Matod niya nga aron di magrabehan sa impact ang awto, iyang gilihay ngadto sa center island ang trak.
Nadaro sab niya ang usa ka poste sa signage ug poste diin gibutang ang CCTV sa Mandaue City Command Center.
Si Indab paingon unta mo-deliver sa 300 ka sako nga bugas ngadto sa usa ka bodega sa Ouano Avenue.
Matod ni Arnold Malig-on, operations chief sa Traffic Enforcement Agency of Mandaue (Team) nga base sa makita sa ilang CCTV, footage nga kusog nga nagdagan ang truck bisan kon duol na sa intersection hinungdan sa disgrasya.
Giawhag ni Malig-on ang ubang mga driver nga kon paingon sa intersection, kinahanglan mominor sa dagan.
Wa maunsa ang driver sa awto nga nadaro, apan ang luyo sa awto naguba tungod sa pagbangga, matod ni Malig-on.
Niresponde dayon ang mga kawani sa Team aron tangtangon ang natumba nga mga poste tungod naay nakaali ang mga wire sa CCTV nga sumpay sa ubang CCTV sa maong intersekyon.
Tungod sa maong disgrasya, adunay traffic light sa interseksyon ug usa ka CCTV nga wa na mogana. (KFD)