ANG gunman sa pagpatay ni Atty. Joey Luis Wee nga si Fausto Edgar Peralta ang mi-apply pagka-state witness sa kasong iyang giatubang.
Samtang aduna nay lead ang National Bureau of Investigation (NBI) sa mastermind sa kamatayon ni Wee.
Si Peralta unang nadakpan sa NBI niadtong Disyembre 8, 2020 didto sa lalawigan sa Laguna.
Si NBI 7 Regional Director Renan Oliva nagkanayon nga mag-agad sa korte kon dawaton ang hangyo ni Peralta nga magsilbing state witness bisan nga siyay maoy gitumbok nga nipusil patay sa maong abogado.
Ang state witness mao ang tawo nga gikiha tungod sa iyang nabuhat nga krimen apan, ubos sa iyang pagtugot, himuon siya nga testigo sa state o publikong prosekusyon ug mabaliwa na ang kaso batok niya.
Base sa giluwatan nga extra judicial confession ni Peralta natumbok nga ang giingong middleman o contractor sa pagpatay ni Wee mao si Army retired Lt. Colonel Edwin Layese.
Si Oliva nihulagway kang Layese nga “uncooperative” sa ilang imbestigasyon sa krimen.
Sa nagpadayong imbestigasyon sa maong pagpabanhig padayon nga nagpakahilom sud sa selda sa NBI 7 si Layese.
MASTERMIND
Bisan pa niini, duna na silay lead kinsa ang mastermind sa pagpatay kang Wee o nisuhol kanila ni Layese ug mga kauban.
Matod ni Oliva nga wala pa silay lig-ong ebidensya nga magtumbok sa maong personalidad ug mahimong masayang lang kung ilang ipasaka ang kaso nga way igong basehanan sa pagkakaron.
Wala na motug-an si Oliva kung naa ba sa rehiyon ang mastermind sanglit wala pa sila masayod kung asa kini karon.
“Naa na tay mga leads ato lang na gi-concrete, kay I would not risk the filing nga ma-dismiss lang, so better not file it than file it prematurely nga ma-dismiss lang kay kuwang og ebidensya,” dason ni Oliva.
Napaubos na sa NBI sa inquest proceedings si Layese sa Cebu City Prosecutors Office apan niduso og waiver ang mga abogado sa akusado nga maoy hinungdan nga gihatagan og higayon nga makasumiter sa ilang counteraffidavit ngadto na sa Enero 25, 2021 sa dili pa mopakanaog og desisyon ang Piskaliya sa kasong murder nga gisang-at sa NBI.
Apan bisan nailhan na ug gipasakaan nag kaso ang gunman lakip na ang nagkuha kanila dili pa matawag nga sulbad na ang pagpatay kang Wee kay padayon pa nga gawasnon ang upat nga kaubanan ni Peralta.
Giangkon ni Oliva nga sa wala pa moluwat sa iyang pinanumpaang pamahayag si Peralta labot sa kaso sa pagpatay ni Wee.
Mihangyo si Peralta sa Integrated Bar of the Philippines IBP Cebu chapter nga ipaubos sa witness protection program.
GIHAMOK SA TANLAG
“Nisuwat siya sa IBP asking for assistance kay nakonsensya kuno siya sa nahitabo. Di gyud siya makatulog mosulti na siya tanan. It is up to the court to decide nga kung pwede ba siya o dili,” matod ni Oliva.
Apan giklaro ni Oliva nga bisan wala moangkon si Peralta lig-on gihapon ang ilang mga ebidensiya nga makabarug na sa korte.
Ang maong pamahayag sa gunman nakapadugang sa kalig-on sa kaso sanglit gibutyag man niini ang pagplano sa krimen lakip na sa kaso ni Attorney James Joseph Gupana didto sa Dakbayan sa Lapu-lapu.
Gibanhigan patay si Wee niadtong Nobiyembre 23, 2020 sa dihang misaka na kini sa edipisyo diin nahimutang ang iyang law office sa dalan J. Panis, Barangay Kasambagan, Dakbayan sa Sugbo.