Dear Atty. Joan,
Duna unta koy ipangatuna kabahin sa nahitabo sa akong anak nga lalaki ug iyang live-in partner nga babaye.
Ang babaye nagpacheck-up sa doktor niadtong Oktubre 2020 human wala na kini gidugo.
Didto nahibaw-an nga buntis ang pares sa akong bata. Mipositibo sab ang pregnancy test sa iyang pares.
Nalipay gayod kami sa maong balita tungod kay ang gisabak sa iyang pares maoy akong labing una nga apo.
Apan dugay na nga di magkasinabot ug kanunay ang panaglalis sa akong bata ug iyang pares.
Madungog namo ang ilang pag-away tungod kay nagpuyo silang duha sa akong panimalay.
Sa miaging semana, naglalis ang akong anak ug iyang pares human gidudahan niya ang akong bata nga dunay laing babaye.
Nahibalo nalang ko pagkasunod adlaw nga milayas na ang babaye sa among panimalay.
Dayon nahibaw-an nako nga gidala sa tambalanan ang baye human pugos nga gi-abort sa iyang pares ang bata.
Nagmalampuson ang pares sa akong bata nga makwaan kini.
Matod pa sa inahan sa babaye, miuli sa maong semana ang babaye sa ilang panimalay.
Nakadungog na lang sila og kusog nga singgit ug tiyabaw ug didto na nila nakit-an ang puya nga migawas sa kinatawo sa babaye.
Nadugmok ang akong kasing-kasing human nahibaw-an ang balita.
Naglaum ko nga magka-apo apan nahanaw ang maong damgo tungod sa gibuhat sa babaye. Wala na nako gipabalik ang babaye sa among panimalay.
Duna bay posibleng kaso nga atubangon ang pares sa akong bata human nga tuyong gipalaglag niya ang iyang bata? Unsa ang among mahimo, Atty. Joan?
Hinaot unta nga matubag nimo ang pangutana ug mabasahan ang akong sulat. Daghang Salamat
Imong magtatampo,
Loida
Dear Loida,
Una sa tanan maayong adlaw usab kanimo diha Loida ug salamat sa imong pagsunod niining lindog.
Subay sa imong gisaysay sa imong sulat, mahimo nga pasakaan og kasong kriminal ang pares sa imong bata.
Tataw sa atong balaod nga ginadili ang pagpalaglag o pagpakuha sa bata, bisan pa man nga dunay pagtugot sa inahan niini.
Mahimong pasakahan og kasong “Abortion practiced by the woman herself” ang inahan ubos sa Artikulo 258 sa Revised Penal Code.
Mahimong mupasaka sa maong kaso sulod sa napu (10) ka tuig human nadiskobrehan ang maong krimen.
Kini nagpasabot nga duna pay igong panahon nga mapanubag ang maong babaye atubangan sa husgado.
Isang-at usa ang maong reklamo sa piskaliya nga maoy muhukom kon angay ba nga ipasaka ang kaso didto sa korte.
Mahimo kamo nga magpa-blotter sa maong hitabo sa Women’s and Children’s Protection Desk (WCPD) sa inyong kapolisan ug magpatabang kanila sa paghimo og sumbong ngadto sa piskaliya.
Daghang salamat Loida sa imong sulat tampo ug hinaot nakahupay ang maong tambag sa naghoot mo karon nga galamhan.
Imong alagad,
Atty. Joan
[Lindog sinuwat ni Atty Joan Saniel-Amit, Executive Director inubanan sa mga abogado sa Children’s Legal Bureau sama nilang Atty. Jenny Cabradilla, Atty. Stephanie Tan ug Atty. King Perez. Mahimo kamo nga mupadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa Facebook Messenger: m.me/ChildrensLegalBureauInc]