SUPERBALITA DAVAO

Dura: Nagminghoy ang SSS pensioners

Ratsada

DI LANG una nato hisgutan dinhi ang mga kasikas sa vaccination program sa Duterte administration sanglit buot nako nga mahibalo ang mga SSS pensioners sa nahitabo sa dugang usbaw sa ilang pensyon.

Naaghat ako sa paghisgut niini tungod kay ubay-ubay sa among mga suking tigpaminaw sa DxGo Aksyon Radyo Davao ang nangutana kung madawat na ba nila ang dugang P1,000 nga pensyon.

Usa sa kanunay mangutana nako mao si Nanay Francing nga taga Tugbok ning siyudad sa Davao.

Sukad pa niadtong bulan sa Agusto sa miaging tuig siya manawag nako kung duna bay balita labot sa ilang pensyon.

Natural lamang nga mangutana ang atong mga senior citizens tungod kay mao man kini ang gipasalig kanila.

Sa matag text ni Nanay Francing nako, ako dayon siyang tubagon nga ato pang gihuwat ang mando sa gobyerno. Ug igo lang intawon si Nanay Francing sa pagtubag nga: "Sige, Alger, maghulat nalang ko."

Ang iyang tingog mituhop sa akong huna-huna ug mIbati dayon ako og kaluoy sa mga senior citizens.

Ug misamot ang akong kaluoy nila dihang gikumpirma ni Social Security System (SSS) Davao Information Officer Greta Quayle nga dili na madayon ang paghatag sa dugang P1,000 nga balanse sa P2,000 nga usbaw sa mga pensioners.

Giingon sa opisyal nga kung duna may mahitabo nga usbaw, kini magdepende sa panudlanan sa ahensya.

Suma pa ni Quayle nga ila nang madeklara nga di na mahatag subay sa katapusang press conference sa milabay nga tuig diin gihisgutan nga mahatag ang dugang usbaw.

Usa sa mga hinungdan niini mao ang diyutay nga koleksyon sa SSS sa mga miyembro tungod kay apektado sa pandemya.

Ambot lang sab kaha kung mahatag gayud sa mga pensioners ang usbaw sa ilang pension kay nagkaanam na man paghubas ang ilang pundo tungod sa sobra ka dako nga kantidad ang mogawas sa SSS alang sa pensyon, kaysa sa mosulod nga kontribusyon ug uban pang kita sa ahensya.

Sanglit hubas-hubas na ang ilang panudlanan, mas maayo nga tun-an pag-usab nila ang mga paagi nga makahatag og dugang usbaw nga patas sa tanan, apan di gayud susama ka dako sa gihatag sa miaging tuig.

Ang nahitabo karon makapahinumdom unta sa atong mga tigpanday og balaod nga gamiton ang cost-benifit analysis ug uban pang prinsipyo sa policy-making, di kay ibase nila sa politikal nga ambisyon sa pipila ka opisyal sa gobyerno.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph