DUHA ka mga police outpost sa Dakbayan sa Talisay gidonar sa usa ka negusyante nga opisyal usab sa Police Advisory Council sa siyudad.
Matud ni Police Lieutenant Colonel Gerard Ace Pelare, hepe sa kapulisan sa Dakbayan sa Talisay, nga ila nang gisugdan sa pagpabarog ang duha ka mga police outpost.
Ilang nauyonan nga kini ipamutang sa Barangay Tabunok ug Bulacao kay daghan og mga tawo ang nahisgutang mga lugar.
Giila ni Pelare ang negusyanteng nidonar nga si Cyril Velasco, kinsa vice chairman sa PAC sa Talisay.
Sa launching sa Martes sa buntag, Enero 19, 2021, uban nila ni Velasco si Pelare ug City of Talisay Traffic Operations and Development Athority (CT-TODA) head Jonathan Tumulak.
Ang pagbutang sa duha ka mga police outpost maoy pagpangandam sa ipatuman nga discipline zone sa Tabunok ug Bulacao.
Si Pelare niingon nga dunay permanente nga pulis nga armado og tag-as nga armas nga ibutang sa outpost.
Abagan kini og usab force multiplier,
Ang mamahimong kaabag sa pulis lakip mao ang mga personnel sa CT-TODA ug representate sa barangay.
“The two elevated outposts are strategically deployed in the busy and progressive business district of Tabunok and Bulacao. It will be manned by police officers equipped with long firearms, lapel as public address system and log book for recording purposes,” asoy pa ni Pelare. (BBT)