NAG-ANAM na og saka ang gidaghanon sa mga naka-recover sa Covid-19 sa Dakbayan sa Sugbo human sa sagunson nga zero sulod sa daghang mga adlaw.
Base sa record sa Department of Health (DOH) 7, ang Cebu City adunay 35 ka bag-ong naayo sa virus niadtong Enero 18, 2021 samtang 41 ang bag-ong nataptan.
Gikan niadtong sa Enero 13, pulos zero ang recovery gikan sa natakboyan sa Covid-19 gawas lang sa Enero 16 nga adunay natala nga 36.
Sa kinatibuk-an, ang Cebu City adunay 383 ka mga kaso sa virus gikan Enero 10 samtang 105 ra ang naka-recover sa Covid-19.
Enero 16, natala sa Siyudad ang labing daghan nga kaso sukad nag-modified general community quarantine ang dakbayan kapin tulo ka buwan na ang nakalabay nga niabot og 61 ka infections.
Si Dr. Michelle Linsalata, officer in-charge sa assistant department head office sa City Health Department (CHD), nagkanayon nga gihingusgan pa sa contact tracing team ang ilang pag-test batok sa Covid-19.
“While we may be experiencing double digit numbers, the numbers are plateauing. All of them are new cases and none of them are close contacts,” matod ni Linsalata.
“This means that, through our contact tracing, extraction, and EOC efforts and interventions, we are consistently managing to control the spread,” matod niya.
Base sa talaan sa DOH ug EOC, nag-anam na usab og kunhod ang kaso sa nataptan sa virus sa niaging upat ka adlaw.
Gikan sa 61 sa Enero 15, nahimo kining 56 pakasunod adlaw; 44 niadtong Enero 17 ug 41 ka kaso sa Enero 18.