VM Apura: Panimawos hayan motibo

File photo
File photo

PANIMAWOS maoy nag-unang nahunahunaan sa pamilyang Apura sa pagpusil kang Konsehal Anthony John “Antoy” Apura sa 3:45 sa hapon, Enero 18, 2021, sa sityo Tangasan, Barangay Valladolid, Dakbayan sa Carcar.

Si Bise Mayor Nicepuro Apura nagtuo nga ang pagkalambigit ni Antoy sa kamatayon sa usa ka tinun-ang lalake sa usa ka unibersidad niadtong 2003 maoy motibo sa pagsuway og patay sa iyang anak.

Si Apura, sa interbyu sa GMA 7 Balitang Bisdak, niingon nga way silay laing nahunahunaan nga motibo kay way hulga nga nadawat ang iyang anak.

Matod niya nga ang nalambigitan ni Antoy mao lang ang kasong murder nga pending karon ang ilang appeal sa Korte Suprema.

Si Antoy, uban kang Sherwin Que, gikombikto sa Court of Appeals niadtong 2014 sa pagpatay kang Mark James Enriquez niadtong 2003.

Si Que maoy niangkon nga siya ang nipusil kang Enriquez. Si Apura gikombikto og apil sa korte isip kakunsabo, apan niapelar sila sa Korte Suprema.

“Wala man siya gyud kadawat og threat. Tingali usa pud nga gitan-aw, di pa ta sure kadtong duna man gud na siya kaso nga pending ron sa Supreme Court nga nahitabo 2003 pa, murag mao ra na,” matod sa amahan nga Apura.

Si Lt. Colonel Allan Rosario, hepe sa Carcar Police, niingon sa pakighinabi sa Superbalita Cebu nga usa sab kini sa ilang gitan-aw nga anggulo.

Apan wa pa nila mahinabi og dugay ang batan-ong Apura aron unta ilang ma-evaluate ang sitwasyon.

Lain nga anggulo mao ang pulitika kay si Antoy maoy barangay kapitan sa Valladolid ug presidente sa Association of Barangay Councils (ABC) ug hayan duna siyay gikaaway o nasilo kaniya.

Apan ang bise mayor daling niingon nga kuli pa kini kay layo pa ang eleksyon.

“Sa politics murag wala ta, aw, dili ta ka kuan, less kaayo ang percentage sa politics kay ngari sa Carcar wala pa man gyuy. Tingali mainit ineg election, pero wala pa may history ngari nga nagpinatyanay tungod sa politika,” matod ni Bise Mayor Apura.

Laing anggulo nga gisubay sa kapulisan mao ang negusyo kay sumala sa ilang nasayran daghan kini og mga negusyo.

Gitataw usab ni Rosario nga di drama ang suway nga pagpatay kang Antoy.

“Hindi talaga ito drama o ano-ano lang buhay ni Konsehal nakataya dito. Yan sa amin imbestigasyon,” dugang ni Rosario.

Gawas nga wa makighinabi kanila ang konsehal, wa pa sila makakuha sa kopya sa close circuit television (CCTV) footage kay gikinahanglan ang IT expert sa pag-abli. (GPL, REV)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph