DAVAO DE ORO -- Way mahatag nga ayuda ang lokal nga panggamhanan sa lungsod sa Compostela sa mga apektado sa African Swine Fever (ASF.
Kini maoy gibutyag ni Mayor Lema Bolo sa lungsod atol sa gihimong pakighinabi kaniya sa Superbalita Davao.
Apan gibutyag sa inahan sa lungsod nga ang mga nanag-iya og baboy nga apektado sa epidemya dunay madawat nga tabang o ayuda gikan sa nasyonal nga kagamhanan.
Nasayran nga duha na ka mga barangay sa lungsod sa Compostela ang apektado sa ASF nga mao ang Siocon ug ang Purok 8 sa Tamia.
Gisulti ni Bolo nga aduna nay naabot nga ayuda gikan sa nasyonal nga panggamhanan alang sa Siocon sanglit mao man kini ang naunang naapektahan sa sakit apan ang Purok 8 sa Tamia wala pa.
Apan gibutyag ni Bolo nga sa paningkamot sa lokal nga panggamhanan sa lungsod, napugngan gayud ang pagkuyanap sa ASF sa Siocon.
Ning higayona, nakig-alayon sab ang LGU sa matag barangay sa tinguha nga di makasulod ang sakit sa uban pang mga lugar o barangay.
Gibutangan sab og mga checkpoint ang pasulod ug pagawas sa matag barangay, inabagan sa mga opisyal ug tanod sa barangay. (Dexter T. Visitacion)