GUMIKAN kay dili gayud kadawat ang usa ka 28 anyos nga lalaki nga wala na sila sa iyang kanhi girlfriend, sekreto kining misulod sa girentahan nila sa babaye ug gipangtabas ang sinina niini gamit ang gunting.
Ala una sa hapon niadtong Dominggo, nagdangoyngoy nga midangop sa San Pedro Police Station si alyas Marie, 29 anyos, beautician ug nag-renta sa Barangay 36-D, Poblacion, Davao City.
Subay sa blotter sa San Pedro police, nasayran nga nakurat na lang pag-ayo si Marie dihang pag-uli niya, misugat sa iyang panan-aw ang iyang mga sinina nga nangagisi ug dunay gunting.
Dako ang pagtuo ni Marie nga ang iyang ex-boyfriend ang naghimo niini sanglit nagbilin kini og suwat sa ibabaw sa mga gisi nga sinina.
Dunay nakasuwat, "Me, nagbilin kog liham sa imo, palayo mo sa Davao kung gusto pa mo mabuhi duha," ang unod sa suwat.
Gisaysay ni Marie sa kapulisan nga dili gyud kadawat ang iyang kanhi uyab nga iya kining gibulagan hinungdan nga nahimo kini sa lalaki.
Dugang nasayran nga usa suma pa sa mga hinungdan maong mibulag ang babaye gumikan sa kabaho og ilok sa iyang ex-boyfriend.
Pagkahuman nga na-blotter sa babaye ang nahitabo kaniya, gimandoan kini sa awtoridad nga ipatawag ang iyang ex-boyfriend sa barangay aron didto sila maghusay.