Kulbahinam nga napukan sa Brooklyn Nets ang Milwaukee Bucks, 125-123, Lunes, Enero 19, 2021 sa usa sa mga panagsangka tali sa mga higanting teams sa National Basketball Association (NBA).
Kining maong kadaugan nagpamatuod usab kon unsa kahait ang panagparis ni Kevin Durant ug James Harden sulod sa korte diin sa kinatibuk-an sila nagkumboya og 64 puntos, 18 ka assists ug 15 ka rebounds.
Gawas niini, ang Nets nakakuha usab og saktong suporta gikan nila ni Joe Harris ug Jeff Green nga naghiusa usab og 34 puntos.
Ilang nalupig ang 81 puntos nga nasumada nila ni Giannis Antetokounmpo, Khris Middleton ug Jrue Holiday.
Una man tuod kining higayon nga kining duha nakapakita og hugot ug kulbahinam nga kumbati, apan dili kini maoy katapusan.
Gituohan nga kini ra gihapong duha ang mag-abot sa Eastern Conference finals. Ang Nets (9-6 ) wa pay pildi sulod sa duha ka duwa sukad sa paghiabot ni Harden. Kini bisan pa man og wala ang laing usa sa ka sakop sa Big 3 nga si Kyrie Irving.
Daghan ang nagtuo nga mosamot na gyud unya og kalig-on ang Nets sa higayon nga mobalik na og duwa si Irving.
Matod pa nga karong adlawa (RP time) moduwa na si Irving sa ilang pagsulong didto sa Cleveland. Apan di usab nato ikalimod nga ubay-ubay usab ang fans sa Nets nga nasagmuyo niining gipakitang attitude ni Irving ubos sa bag-o niyang team tungod kay nagsigi na lang kini og palta.
Wa kini kalahian sa nahitabo sa dihang si Irving didto pa usab sa Boston Celtics.Niadtong higayona ang Celtics namupo og mga kadaugan sa sayong bahin ug miabot sa playoffs nga wala magkinahanglan sa serbisyo ni Irving kinsa giingon nga aduna injury.
Apan sa iyang paghibalik og duwa nakaangkon na hinuon sila og sunodsunod nga kapildihan ang Boston nga maoy usa sa mga rason sa ilang pagkataktak.
Sayo pa man tuod nga hukman, apan hinaot nga dili kini mahitabo sa Nets. Kon magpabilin gihapon nga dakong labad sa team si Irving, mas maayo pa siguro mag-andam si coach Steve Nash unsay sunod niyang lakang samtang hataas pa ang panahon.
Sa gikaingon ko na kaniadto pa, mag-unsa man ang Big 3 kon dili ikasabot ang usa niini. Sa sitwasyon karon, di kalikayan ang paghulagway ni Irving nga mao na hinuon ang problema sa team. (jun.migallen22@gmail.com)