CARMELO D. LARIOSA
Panadtaran, San Fernando, Cebu
Mihugpa ang kamingaw
Apan nagpabiling buhi
Ang tingog sa kagabhion
Daw tugtog sa piyano
Sa kalag nga naghinulsol
Ug masabtan lang ang sonata
Sa binilanggong kasingkasing.
Mosamad pod sa subong dughan
Ang tingog sa ulan nga buot
Hinginlan sa sabaang hagok
Sa nahinanok nga anino
Ug isipon na nga basag nga huni.
Usahay magduhawit ang tingog
Sa kagabhion ug ang huni sa ulan.
Matahom tan-awon ang pagtikyop
Sa kagabhion unya piyungon
Ang mga mata aron modulot
Ang kahulugan nga nagtalad
Sa hinikalimtang mga damgo.
Tinuod madungog mo ang tingog
Sa kagabhion apan di mo kini
Mabati diha sa tingog sa ulan.
Managlahi ang rumbo sa kinabuhi
Ikaw naglakaw karon apan ugma
Sa lungon ka mohigda.
Oo, ang tingog magpabiling tingog
Bisan wala nay kagabhion nga moabot
Ug wala nay ulan nga mobunok.