FRED NUNEZ CANETE
Alegria, Cordova, Cebu
Siya si Barto. Badlungon nga numero uno sa ilang baryo. Palahubog. Maldito. Apan labaw sa tanan, kiriwan. Basta mokatol ang kamot, magluos kinig pamitlok og manok nga dili iyang binuhi. Ug sukad, wa hisakpi ang kanahan aron manubag sa dautan niyang binuhatan.
Apan karong bag-o, hisakpan na gyud si Barto. Dili sa mga pulis. Dili pod sa mga barangay tanod. Kundili, sa pandemik nga kagaw - ang korona bayrus! Positibo ang ulitawo sa gikalisangan nga balatiang Covid 19. Puwerting lipaya niadtong mga naglagot niya. “ Maayo ra! Maytag mamatay ang karaho...!” Ug, natinuod. Kay namatay gayud ang ulitawo. Wa maatiman og doktor. Wa dawata sa mga ospital kay puno sa pasiyente gumikan sa pandemiya.
Sanglit way tagtungod nga mipatim-aw, ang barkadang mga palahubog ang mihipos sa patay niyang lawas. Ilang gihimuan og lungon si Barto. Unya gihatod sa sementeryo aron ilubong. Apan haskang demalasa! Gibalibaran sa sepulturero kay puno pod ang sam-ang sa ilang lungsod. Mao nga ila na lng gitambog sa lawod ang lungon ni Barto. Kon asa kini idagsa, wa na sila maghago sa paghunahuna. Pero ilang gipanghinaot nga mahadangat unta sa Diyos ang kalag sa ilang higala.
Tuod man, didto sa opisina ni San Pedro atbang sa ganghaan sa Langit, nahitugpa ang kalag ni Barto. Gi-interbiyo siya ni San Pedro. Ug human tamdi ang taas kaayong listahan sa iyang atubangan, nagkanayon ang tigulang balaan: “ Aha! Ikaw diay si Barto Wahing sa barangay Alegria, Cordova, Cebu?”
“Oo, ako, “ tubag ni Barto.
Miyanguyango si San Pedro. Unya gitawag si San Miguel. “ Guel...iskorte kini si Barto ngadto sa impiyerno.” Nauknol si Barto,“ Ha? Di na diay ko ani bistahon?” “Dili na. kay hinukman ka nang daan sa didto pas kalibutan.” “Pero, Nyor Dro...” buot moreklamo si Barto, apan giguyod na siya ni San Miguel. Miuban na lang siya. Nagbitbit ra ba kinig espada.
Unya nahasiga iyang mga mata pag-abot nila sa impiryerno. Bung-aw sa nag-asaw-asaw nga tubig-kalayo ang nabantang sa iyang tinan-awan. Didto sa ubos nanagtimpasaw ug nanagtiyabaw ang mga kalag nga sinilutan. “Mao na ang impiryerno, Nyor Guel?”
“ Mao. Anha ka dinha itambog karong taudtaod!”
Sa nadungog, nag-ulhos-ulhos pagkupos ang duha niya ka itlog. Mikuray sa tumang kalisang si Barto. May tawong sungayan ug ikugan ang miduol. Si Beelsebub, ang prinsipe sa tanang demonyo og panagway. Nagpahibalo nga puno na ang impiryeno. Unya giingnan si Barto.”May suwerti ka, Pare, kay di ma-‘tinuwa’ karong adlawa.” Mingisi kini ug mitalikod. Nagkitoy-kitoy ang ikog.
Namalik sila kang San Pedro. Gisayran sa lakaw nila. “Kon mao...adto ka lang una sa purgatoryo, Barto,” mihukom ang sinaligan sa atong Ginuo. Apan mao gihapon. Puno pod ang purgatoryo, ang dapit linisanan sa mga kalag nga gagmay rag kasal-anan. Naglibog ang tigulang balaan. Naghinuktok. Naghapyud-hapyod sa puti niyang bungot. “Asa ta ka kaha ka idestino, Bartoha ka?”
Takulahaw may proposal si Barto. “Niay maayo, Nyor...anhi lang ko sa imong opisina, para may masugo-sugo ka!”
“Unsa?” nahimalingka ang tigulang balaan. “ Ka kawatan ra ba nimog manok! Di ko! Mahurot unya akong hinik...”
Apan kalit naabli ang pultahan sa Langit. Unya may gamhanang tingog ang nadungog. “Pedrooooo! Pasudla na lang diri sa Langit kana si Barto! Kay bisag asa, ug bisag kinsa wa nay modawat kaniya. Apan ako nga iyang Maglalalang puno sa kaluoy, kaaghop ug pagsabot. Gipasaylo ko na kana si Barto. Busa, ari sa Langit siya papuy-a!”
Nakalukso sa kalipay ang kalag ni Barto. Puwerting mug-ota sa dagway ni San Pedro. (KATAPUSAN)