Patay ang usa ka lalaki nga nag-ayo sa cable sa Wi-Fi connection ug naangol ang iyang kauban human nakahikap og live wire, alas 8:00 sa gabii sa Sabado, Pebrero 25, 2023, sa Barangay Masaba, dakbayan sa Danao.
Si Jenlo Barber Castro, 22, ulitawo ug taga Purok Toong-Dancar, Barangay Dunggoan, Danao, gideklarar nga dead-on-arrival (DOA) sa Cebu Provincial Hospital sa Danao.
Samtang, luwas na ang kahimtang ni John Berth Jimenez Arive, 21, ulitawo, ug taga Ylaya, Barangay Guinacot, Danao, kinsa nakaangkon og daghang paso sa lawas.
Sa imbestigasyon ni Police Staff Sgt. Gerome Pesidas sa Danao City Police Station (DCPS), nasayran nga ang duha gisugo sa ilang agalon nga ayuhon ang connection sa ‘piso-piso’ nga Wi-Fi sa dapit.
Si Pesidas nihulagway nga bukiran ang maong dapit, ngitngit ug nag-uwan-uwan atol sa pag-ayo hinungdan nga wala makakita sa daut nga linya sa kuryente.
Ang mga residente sa dapit ningsuway sa pagtabang sa duha apan, si Castro gideklarar sa mga doktor nga DOA tungod sa kakusog sa bultahi sa kuryente nga nilatay sa iyang lawas, kinsa gituohan nga unang direktang nakahikap sa live wire.
Atol ning pagsuwat, wa pa makuha sa kapulisan ang habig sa giingong agalon sa duha nga maoy nagsugo sa pag-ayo sa connection sa Wi-Fi.
Ang kapulisan mohimo og dugang pakisusi bahin sa maong hitabo. (GPL)