“Under control gihapon.”
Kini maoy pahayag ni Grace Mary Carungay, city epidemiological and surveillance unit officer sa Lapu-Lapu, kalabot sa nagsaka nga ihap sa kaso sa coronavirus disease (Covid-19) sa siyudad.
Matod ni Carungay nga base sa ilang datus, niabot og double digits ang ihap sa bag-ong kaso sa Covid-19 sa dakbayan niadtong Enero 19, 2021 diin niabot kini sa 14.
Nisaka sa 94 ang kinatibuk-ang ihap sa Covid-19 active cases sa Lapu-Lapu diin nag-una niini ang Barangay Basak nga adunay 22.
Gisundan kini sa 12 ka kaso sa Pusok, tag 10 sa Pajo ug Pajac, pito sa Maribago, tag unom sa Mactan ug Agus, lima sa Bankal, tag tulo sa Subabasbas ug Gun-ob, tag duha sa Babag ug Tingo, ug tag usa ka kaso sa Marigondon, Calawisan, Canjulao, Poblacion, Buaya, ug Baring.
“Sa atong namatikdan gikan sa single digit natong new cases Enero 19, 2021 nisaka tag duha. Aduna tay bag-ong 14 cases, aduna tay gamayng kabalaka tungod kay misaka ang kaso pero under control lang ghapon,” matod ni Carungay. Dugang ni Carungay nga home transmission ang usa sa ilang nakita nga hinungdan sa pagsaka sa kaso sa Covid-19 sa Lapu-Lapu.
“Mostly ang nakapataas sa atong cases kay ang home transmission. Daghan ang late nga magpa-swab ug wala mi-isolate dayon sa iyang pamilya og mga kuyog sa balay, maong mas dali magtakod,” matod ni Carungay.
Giawhag ni Mayor Junard Chan ang publiko nga motawag sa hotline sa dakbayan kon adunay gipamati nga sintomas sa Covid-19.
“Wa ta mohunong sa atong panawagan nga if they have symptoms they will call our hotline. Naa ra na 24/7... Atong hotline nagpaabot ra na motawag sila, so that if there are symptoms ato silang mapa-check, dili sila makagawas sa maong panimalay,” matod ni Chan.
Nagkanayon ang mayor nga andam mohatag ang dakbayan sa mga panginahanglon sa mga balay nga apektado sa Covid-19.
“We will provide them everything. We will provide them the food. Ma-check nato sila, maatiman nato sila if there is somebody dunay sintomas ato dayon mapa-swab para di mutakod sa ubang mga tawo,” matod ni Chan. (NDT)