Wa pa makahukom ang Vaccine Advisory Committee (VAC) kon unsa nga brand sa bakuna ang paliton sa Cebu City Government.
Si City Administrator Floro Casas Jr., miyembro sa VAC nga giumol ni Mayor Edgardo Labella, nagkanayon nga nakahinabi na sila sa mga representante sa Astrazenica ug Pfizer.
Plano pa nilang estoryahon ang ubang mga manufacturer sa bakuna batok sa coronavirus disease (Covid-19).
Si Casas nibutyag nga ilang pilian ang mga bakuna nga ma-approve sa Food and Drugs Administration (FDA) ug maoy paliton sa Siyudad gamit ang P400 milyones nga pundo nga nasukip sa giaprobahan nga 2021 annual budget.
“As to unsa gyud nga brand ang atong gamiton, how to implement anang mass vaccination, nag-create na si Mayor og committee to draft the guidelines,” matod ni Casas.
Matod ni Casas nga gitan-aw usab nila karon ang pagkuha sa serbisyo sa mga medical technology ug nursing students para makatabang sa Siyudad sa umaabot nga mass vaccination.
Gipangitaan usab karon og posibleng lugar nga haom sa daghang mga tawo ug layo ang transmisyon sa Covid-19 para sa pagpamakuna.
Apil na sa ilang gitan-aw ang klase sa refrigeration system nga ilang gamiton nga magdepende sa brand sa bakuna nga ilang paliton sanglit adunay vaccine nga nagkinahanglan og -70°C para sa iyang storage. (PAC)