GIHIMOAN og balaudnon ang greeting o pagtahod ug patimbaya sa mga Pinoy panahon ning pandemic. Gikan sa naandan nga lamano ug uban pa, ang balaudnon naglatid nga ibutang ang tuo nga palad sa wala nga dughan ug dayon moduko.
Pastilan, sa kadaghang suliran sa nasod karon, kani pa nga balaudnon ang nahuna-hunaan. Wa na man gud kinahanglana ni nga balaura tungod kay nakahibawo na man ang tagsa-tagsa unsay buhaton samtang naa pa ang hulga sa coronavirus disease sa nasod.
Ang labing importante karong panahuna mao ang pagpabangon sa ekonomiya taliwa sa daghang mga gipangdili. Unsaon pagpabalik sa nangawagtang nga mga trabaho pinaagi sa pagbuhi og balik sa nangatumbang mga kompaniya.
Mangita og paagi aron makapaspas sa iyang ekonomikanhong pagbangon ang nasod human magusbat tungod sa mga lockdown sa nanglabay nga mga buwan. Mangita sila og paagi unsa nga mga balaudnon ang gikinahanglan nga makaabag sa mga negusyante ug sektor nga labing apektado sa mga lockdown.
Hangtod gud karon, daghan pa ang nag-ilaid sa kalisod tungod kay nawad-an sa panginabuhi. Ang ubang mga negusyo hinay pa og dagan tungod kay wa pay mga kustomer. Duna say uban nga nasud-ipan tungod sa mga rekisitos ug dunay apektado sa online nga mga pamaagi sa mga transaction.
Nganong daginuton pa man ang paghimog balaud aning atoang pagtimbaya sa usag usa? Maora man og bata nga kuwang sa kabuot ang publiko nga bisan ining butanga himoan pa man og balaud? Pag-usik-usik lang ni sa panahon ug atensyon.
Naa bitaw mga balaud nga mas sayon nga ipatuman, apan gikalimtan lang. Ang usa ini mao ang di pa dugay nga Anti-Distracted Driving Act nga sa pagsugod, grabe ang pagpatuman. Tan-awa karon, kadaghan sa mga nagmaneho og sakyanan ug motorsiklo nga kon wa man gani kaestorya sa phone samtang nagmaneho, nag-utingkay sa GPS. Karon tan-awon ra sa mananakop.