DIGOS CITY -- Mahimo nang manakop ang mga opisyal sa barangay ngadto sa mga drayber nga nagagamit og bora-bora nga tambutso sa ilang motorsiklo.
Kini human nga hugot nang gidili sa bisan asang bahin sa dakbayan ang paggamit og bora-bora nga tambuttso.
Subay sa City Ordinance Number 14-10, adunay multa nga P2,500 ang madakpan nga migamit og bora-bora sa ilang motorsiklo.
Hilabihan na ang reklamo sa mga molupyo sa dakbayan gumikan sa kahasol sa mga bora-bora diin daw misiaw ang mga gahi'g ulo nga motorista sa paggamit niini ning panahon sa pandemya.
Apan sumala ni Hazel nga taga Barangay Matti ning dakbayan, mas maayong ipa-impound na lamang ang mga motor nga migamit og bora-bora aron motagam ang mga malapasong drayber.
Alang niya, sagad sa mga motor nga bora-bora ang tambutso, seguradong wala marehistro sanglit di kini makalusot sa emission test pa lamang.
Di lang sa dakbayan sa Digos ang maong suliran sa publiko gumikan kay mao sab kini ang reklamo sa mga molupyo sa lungsod sa Sulop, Bansalan ug uban pang dapit sa probinsiya.
Sa lungsod sa Magsaysay, nag-anam na kahanaw ang mga bora-borang tambutso gumikan kay di kini makalusot sa ilang border checkpoint pa lamang ug kanunay sab nga ginaronda sa kapulisan. (Orlando B. Dinoy)