DAVAO DEL NORTE -- Gipanghimakak sa usa ka jail guard sa Davao Prison and Penal Farm o kanhi Davao Penal Colony (Dapecol) ang pasangil nga gipakatag batok kanila.
Sa paghinabi sa Superbalita Davao sa jail guard nga wala magpabutyag sa ngalan pinaagi sa telepono, siya nag-ingon nga pagguba ug pagpangdaut lang sa maayong pagdumala sa pasilidad ang maong isyu.
Unang migawas ang isyu sa Facebook page sa usa ka istasyon sa radyo sa siyudad sa Davao nga nagkanayon nga ang correction officer sa Dapecol nagpakanaug og kamandoan nga gidid-an na ang mga babayeng di empleyado nga magtiner o mopuyo sa pasilidad kung asa nagpuyo ang mga jail guards o opisyal.
Matud pa nga ang kamandoan migawas human nadawat ni General Julie Mae Taguam, correction officer sa Dapecol, ang reklamo sa usa ka person deprived of liberty (PDL) nga gihimong kaipon o giuyab sa mga jail guards ang ilang mga asawa ug wa na silay nahimo sa kahadlok nga isulod sa bartolina.
Gitataw sa wa magpaila nga jail guard nga di sila mohimo og ingon niini nga salaud gumikan nasayud silang silot ang ilang abuton ug malabay sa layong dapit o di ba kaha matanggal sa serbisyo.
Gawas pa, sumala niya, di sab sila mangdaginot og asawa sa mga PDLs.
Sa pikas bahin, gipanghimakak sab sa nahisgutang jail guard ang laing pasangil nga gipadangat ngadto sa Radio Kokak sa probinsiya sa Davao De Oro nga ginapawngan nila og sugang dagitab ang Dapecol sa tibuok adlaw ug mga PDLs nag-antus sa kainit sulod sa pasilidad.
Hiunon, giangkon niya nga ginapawong nila ang kuryente sa pasilidad sulod lang sa duha ka oras gikan alas 6 sa buntag hangtud alas 8 sa buntag apan dili tibuok adlaw gumikan kay dunay mga priso nga edaran na di makaantus sa kainit.
Puno pa niini, sa higayon nga dunay brownout, ang pasilidad dunay nakaandam nang generator. (Dexter T. Visitacion)