SOUTH COTABATO -- Amahan nga giingong naaburido kay gibiyaan sa asawa mipusil patay sa iyang 2 anyos nga anak alas 4:00 sa hapon, Miyerkules, Enero 20, didto sa siyudad sa Heneral Santos.
Ang suspek giila nga si Franklin Cifra Sr., 43, drayber ug molupyo sa Mudia Extension, Barangay Labangal, sa nahisgutang dakbayan.
Sa taho gikan sa Makar Police Station, nasayran nga hubog nga nahiabot ang suspek sa ilang balay ug naabtan niini ang iyang anak nga nagsige og hilak.
Gikasab-an sa amahan ang bata apan misamot hinuon og paghilak gumikan kay gigutom.
Tungod sa kapungot sa suspek, mikuha siya sa gitipigan nga .38 revolver ug gipusil ang anak, unya gipusil sab niya ang kaugalingon.
Patay on the spot ang mag-amahan nga pulos nakaangkon og samad pinusilan sa ulo.
Nasayran nga sa wala pa ang pagpamusil, gibiyaan diay ang suspek sa iyang asawa gumikan sa kapalahubog niini niadtong bulan pa sa Nobyembre 2020.