Suma sa Republic Act (RA) 7492 kun “Senior Citizens Act of 1991”ang tanang mga tawo sa Pilipinas, nga nag-edad og 60 anyos pataas, makapahimus ning mosunod: 20 percent nga discounts sa domestic transportation, hotels, restaurants, theaters ug sa mga tambal nga paliton. Exempted usab sila sa pagbayad sa individual income tax returns ug pag-establisar sa Office of Senior Citizens Affairs (OSCA).
Ang pangulo sa OSCA dinhi sa Cebu City mao si Jeffrey Ocampo. Suma kang Teofy Gutang, chief sa Mayor’s Information and Liaison Office (MILO) sa Barangay Capitol Site, maayo kaayong pagkadala ni OSCA head Ocampo ang maong buhatan tungod sa paghatag niya og daling pagtagad sa mga isyu kalabut sa mga senior citizen.
Ang financial assistance sa senior citizens sa Cebu City mokabat og P12,000 matag tuig kun P1,000 matag buwan. Kaniadto, ang beneficiaries mokobra sa financial assistance adto sa mga barangay gyms ug ubang mga dapit apan karon ipaagi na kini sa cash card sa Land Bank of the Philippines. Hinaut pang magpadayon kining maayong serbisyo sa OSCA ubos kang Jeffrey Ocampo sa administrasyon ni Mayor Edgardo Labella.
* * *
Ang mga tinugyanan sa balaud nagpadayon sa pag-imbestigar sa kamatayon ni manlalaban Joey Luis Wee niadtong Nobiyembre 23, sa miaging tuig. Naa nay mga dinakpan nga ang uban miangkon na sa maong krimen. Apan si kinsa man ang mastermind?
Ang una nakong ipangutana kon adunay patyon mao ang motibo kon posibleng katarungan sa paghimo sa krimen. Mao nang sa among programang “Hello Cebu” sa CCTN – channel 47 uban kang Konsehal Malou Ouano Inocando Tabar, wa ko muto-o sa unang report nga si army Lt. Col. (ret.) Edwin Layese maoy mastermind. Nakapangutana ko og unsay motibo niya sa paghunos sa kinabuhi sa abogado? Kon wala man nagduda ko nga tingali og middleman lang kun contractor lang siya. Mao na usab kini ang gituho-an sa National Bureau of Investigation (NBI) 7. Kon tinuod nga P400 mil ang gihatag niya sa grupo pagpatay kang Atty. Wee mas labaw pa gyud niini ang iyang gipangayo sa mastermind aron madako ang iyang bahin.
Gilambigit usab si Layese sa pag-ambush kang manlalaban Joseph James Gupana niadtong Oktubre 10, 2020. Sumala pa nasuko si Layese kang Gupana. Apan ang maayong tuki-on pag-ayo sa mga tinugyanan sa balaud mao kining impurmasyon nga kining maong grupo sa mga criminal nalambigit sa pagpatay sa mga abogado sa laing dapit sa nasud. Hired killers kuno sila.
Hinaut pang makahatag kinig kasulbaran sa daghang kaso sa pagpatay sa mga abogado dili lang dinhi sa Sugbo apan sa uban usab nga dapit.(mannyrabacal1144@gmail.com)