Si Lapulapu ang nakabuntog ni Ferdinand Magellan ug giila nga labing unang bayaning Pilipino, hapit malubong sa kalimot sa atong kasaysayan. Maayo na lang gani kay ang mga bata moingon, “One plus one equals Magellan. Two plus two equals Lapulapu.”
Tingali dihay taga Central Bank nga nakakuot sa lubot, gibutang ang imahen ni Lapulapu sa usa ka dako, one centavo. Pero ang mga bata di na mopunit niini kay way mapalit ang usa ka dako, bisan pa kon ginaingon nga way piso kon way usa ka dako.
Apan si Lapulapu nipilit na sa ikaduhang labing dakong kuwarta sa nasod. Niadtong Lunes, ang Bangko Sentral ng Pilipinas (BSP) ug ang National Quincentennial Committee (NQC), nilusad sa P5,000 Lapulapu commemorative banknote ug medal sa pagsugod sa 99 ka adlaw nga ihap hangtod sa ika-500 nga anibersaryo sa “Kadaugan sa Mactan.”
* * *
Ikaduha lang sa kantidad ang papel de bangko ni Lapulapu. Ang kinadak-an mao ang limited edition P100,000 bill alang sa Philippine centennial sa 1998. Apan sa gidak-on sa kuwarta, dako gyud ang kang Lapulapu kay mas dako pa kini sa ordinaryong papel de bangko.
Gani, gikabuangan kini sa mga netizens kay di na kini paarang sa ilang pitaka. Dunay miingon nga ½ crosswise kini sa bond paper. Morag katunga ang gidak-on sa Q-pass sa Cebu City, ang giingong kinadak-ang Q-pass sa Pilipinas.
Way angay kabalak-an ang mga netizens kon di kini maarang sa ilang pitaka. Ang papel de bangko nga naa si Lapulapu usa lang ka commemorative banknote. Di kini alang sa general circulation. Plano sa BSP nga usa ka libo lang ka buok ang ilang iprinta.
* * *
Nakadawat og usa ka buok P5,000 Lapulapu commemorative banknote ang kagamhanan sa Syudad sa Lapu-Lapu gikan sa BSP. Si Cindi King-Chan, pangulo sa City Tourism Cultural and Historical Affairs Commission (TCHAC) sa Lapu-Lapu, niingon nga ila kining ipa-laminate.
Ila kining i-display isip kabahin sa ika-500 ka tuig nga kasumaran sa Kadaugan sa Mactan karong Abril 27. Apan nagpareserba sila og laing 200 ka buok niini kay mao kini ang ilang ihatag sa mga espesyal nga bisita sa mga kalihukan sa dakbayan sa umaabot.
Wa pa ta kahibawo kon si Lapulapu ginganlan ba sa ngan sa isda o ang isda maoy ginganlan sa ngan ni Lapulapu.
Apan tungod sa sugyot ni Presidente Rodrigo Duterte, nabutang siya sa P5,000 nga papel de bangko gikan sa kinaubsan nga usa ka dako.