USA ka call center agent nakuhaan og kapin sa P1 milyon nga balor sa shabu sa buy-bust sa dalan Urgello, Barangay Sambag 2, Siyudad sa Sugbo sa alas 9:30 sa gabii, Enero 20, 2021.
Ang malampusong operasyon gihimo sa mga sakop sa Abellana Police Station.
Ang nadakpan giila nga si Charlemagne Bolisay Zosa, 21, taga Casa Mira Subdivision, Barangay Linao, Siyudad sa Talisay.
Giila nga high value individual si Zosa ug nalakip sa data base sa Abellana police station.
Nakuha gikan kaniya ang 155 gramos sa gituohang shabu nga mobalor sa P1,054,000 ug motorsiklo nga iyang gigamit sa ilegal nga operasyon.
Matod ni Police Major Elisandor Quijano, ang hepe sa Abellana Police Station, nga dul-an usa ka buwan nila nga gipanid-an si Zosa sa dihang siya ang itudlo sa pipila ka mga nadakpan nga kuhaanan sa shabu.
“Nigawas man gud na iyang pangalan sa mga nadakpan namo nga namaligyag shabu nga siya ang source, mao to among gi-surveillance mga one week. Positive man mao to among gihimo ang buy bust,” matod ni Quijano.
Dugan ni Quijano nga padayon pa ang ilang imbestigasyon kung kinsa ang tig-supply kaniya sa ilegal nga drugas apan nagtuo sila nga gikan sa kaulohan ang shabu. (AYB)