KAPULISAN sa Siyudad sa Sugbo mosugyot ngadto sa Emergency Operation Center (EOC) nga ibalik ang control points sa 40 ka mga barangay nga misaka ang kaso sa coronavirus disease 2019 (Covid-19).
Nabantayan nga nikompyansa ang mga residente ug wa na motuman sa minimum health standard sama sa wa na pagsul-ob sa mask ug face shield kon manggawas sa ilang balay.
Gumikan niini, gitinguha karon ni Police Colonel Josefino Ligan, pangu sa Cebu City Police Office, nga ibalik ang mga barangay control points.
Ang mga pulis nga magbantay mobadlong sa mga lumolupyo nga wa motuman sa mga protocol ug mapugngan ang pagpanggawas nga way mga quarantine pass.
“Targeted barangays lang. Katong akong gi-mention nga 40 barangays nga atong balikan og control point. So, makig meeting ta balik kang Councilor Joel Garganera sa EOC together with the barangay captains to identify katong mga barangays nga for the last days nga wala gyud mo menus ang cases, wala mo gamay,” matod ni Ligan.
Gisaad ni Ligan nga adunay ibutang nga mga pulis sa matag barangay control point aron moabag sa mga tanod ug volunteers sa pag-monitor sa mga residente nga wa motuman sa health protocol.
Samtang duha ka team sa Task Force Cebu, Bohol ug Siquijor sakay sa armored personnel carrier (APC) maoy gitahasan nga mo-roving sa kabarangayan aron mobadlong sa mga malapasan sa lagda sa Inter-Agency Task Force.
“Pag pahimangno gihapon kay nahug nga nakalimot napud ta, murag ni kompyansa tungod kay naanay balita sa vaccine mao nang kompyansa na,” matod ni Ligan. (AYB)