NAKATAYMING ko kausa nga ginganlag “sweetheart of the dance floor” si Maymay Entrata pero igo ra gyud ni naglakawlakaw morag nag-fashion show.
Asa ang hustisya sa titulo? Di hinuon ko moreklamo kon tawgon siyag “sweetheart of the ramp” kay maayo man siya mopaso.
Gani gikuha man siya ni Furne Oné kausa dihang nagpahigayon kinig fashion show (sa gawas sa nasud ha!) mga duha na tingali ka tuig ang nilabay.
Kon may moreklamo nga mga modelo sa ikaduhang titulo, problema na kana ni Maymay.
* * *
Matag Dominggo nahimo na nakong kalingawan ang paglayat-layat sa tulo ka mga channel sa TV: Channel 5, Channel 7 ug Channel 20 kay maghulat kog unsay makasangit sa akong atensyon.
Sama sa nangaging Dominggo, kalagmitan gyud masangit ko sa Channel 5 labina sa mga dance numbers. Duda nako, mas ganahan ko sa choreography kon ikomparar sa duha ka channels.
Posible usab nga napul-an na ko sa choreography sa duha ka channel.
* * *
Gi-anugnan gyud ko sa pagkatagak ni Luis Gragera sa “Tawag ng Tanghalan” (TNT) Resbakbakan sa niaging semana.
Nindot ang iyang tingog, artistahon ang iyang pamarug.
Ugaling lang kay nakalimot siyag usa ka linya sa iyang gikanta. Nahuman hinuon niya ang kanta nga mora lag way samî pero nakahilak gyud siya.
Duna hinuon koy suspetsa nga kon may mo-handle niya nga maayong manager, mosikat siya. Atangi!
* * *
Kilug-kilogan ko kon moingon na ang usa ka contestant sa TNT “seseguraduhin ko na masungkit” o unsa pa diha. Hambog ra kaayo.
Indigay baya na! Daghang posibilidad ang mahitabo (usa na ang nahitabo ni Luis).
Maayo pa tingalig moingon sila nga: “gagawin ko ang lahat na aking makakaya” di pa hambog paminawon
* * *
Pastilan gyud ni si Tiya Covid. Nilabáy lang intawon ang Pista Senyor ug dagkong mga kalihukan nga mora lag way nahitabo labina sa mga taga lalawigan.
Sa makausa pa, manghinaut ko nga mawagtang na kini siya sa nawong sa kalibutan sa labing daling panahon. Ning paghinapos sa bulan sa Enero, mosangpit gihapon ko sa Balaang Bata, pit Senyor!