NAKATALA of 14 ka mga bag-ong kaso sa coronavirus disease (Covid-19) ang Cagayan de Oro, tanan niini mga local transmissions, sigon sa usa ka opisyal sa City Health Office Huwebes, Enero 21, 2021.
Ang kinatibuk-ang ihap sa mga kumpirmadong kaso sa Covid-19 sa dakbayan anaa na sa 3,176.
Sumala ni City Health Officer Dr. Lorraine Nery, sa 14 ka mga bag-ong lokal nga kaso, usa ang person deprived of liberty (PDL), upat ang mga close contacts sa mga pasyenteng nagpositibo sa coronavirus, duha ang mga lokal authorized persons outside residence (Apors), ug pito ang mga local index cases.
Sa 3,176 nga kinatibuk-ang kaso sa Covid-19 sa syudad, 417 ang mga returning overseas Filipino workers/locally stranded individuals (ROFs/LSIs) ug 2,759 ang mga local transmissions.
Matud ni Nery, sa 2,759 nga mga local nga kaso, 184 ang mga PDLs, 1,399 ang mga local index cases, ug 1,176 ang mga local cases with link.
Ang Cagayan de Oro naay 346 ka mga active cases, 106 niini na-admit sa Northern Mindanao Medical Center ug uban pang mga ospital sa syudad, 235 ang mga outpatients, ug lima ang mga ROFs/LSIs.
Nakatala usab og 31 ka mga Covid-positive nga mga kaso nga karon naka-recover. Anaa na karon sa 2,668 ang ihap sa mga nakarekober nga mga kaso sa dakbayan.
Sa maong numero, 296 ang mga LSIs, 115 ang mga ROFs, ug 2,257 ang mga lokal nga kaso (community: 1,901; Apors: 356).
Ang ihap sa mga namatay sa Covid-19 sa syudad naa sa 162.