DAVAO DE ORO -- Gipaneguro ni 1st District Representative Manuel "Way Kurat" Zamora nga taliwala sa pagpositibo niya sa coronavirus disease (Covid-19), padayon ang iyang pagserbisyo sa katawhan sa probinsiya ug ang iyang buhatan bukas sab alang sa mga tawo nga nanginahanglan og tabang ug sebisyo.
Wa makalingkawas ang kongresista sa Covid-19 human magpositibo sa kagaw niadtong Huwebes sa buntag, Enero 21, 2021.
Si Zamora mismo maoy nagpahibawo niini sa iyang opisyal nga pamahayag ug nagkanayon nga naka-quarantine na siya sukad pa niadtong Enero 17, 2021.
Giklaro sa kongresista nga kompleto siya sa mga tambal ug padayon ang komunikasyon ngadto sa iyang doktor samtang naka- self isolate siya.
Samtang nanawagan ang kongresista sa mga tawong dunay closed contact kaniya nga mag-self quarantine usab ug motaho sa opisina sa lokal nga panglawas aron mamonitor ang kahimtang. (Dexter T. Visitacion)