DAVAO DEL SUR -- Daghan ang nalipay human nahukman sa korte nga "guilty" sa kasong "large scale estafa" ang founder sa Rigen Marketing Investment scheme nga si King Paul Bryan Auditor niadtong Huwebes, Enero 21, 2021.
Sa gipakanaug nga desisyon ni Regional Trial Court Branch 2 Presiding Judge Susana Baua, gihukman si Auditor nga mabilanggo gikan 10 hangtud 14 ka tuig.
Si Auditor gimandoan sab nga mobayad og P8.4 milyones ngadto sa mga reklamante.
Lakip nga gimando sa korte ang pagsikop sa igsuon niining si Kharl Dexter Auditor ug laing usa nga si Romen Samuel Wabina.
Miani ang maong hukom og pagdayeg gikan sa mga nahimong biktima niini dinhi sa probinsiya sama kang Rosita, 45, kinsa nakabutang og kapital nga P200,000 sa buhatan sa Rigen didto sa Barangay Sinaragan, Matanao sa nahisgutang probinsiya.
Nalipay sab ang drayber og traysikel nga si Rodrigo, 35, kay bisan og P10,000 lamang ang iyang na-invest sa Rigen, nahatagan gihapon og hustisya ang pagkailad niya.
Apan nasubo ang ubang investors sama kang Benjamin, 42, nga taga Bansalan sanglit giutang pa niya ang P20,000 nga puhunan ug hangtud karon gihinay-hinayan pa niya og bayad gikan sa kita niini sa ilang basakan.
Lab-as gihapon sa panumdoman ni Helen, 52, ang nahitabong "scam" kaniya sanglit wa gihapon nalukat ang giprendang basakan nga mobalor sa P300,000.
Usa sa mga rason sa ilang kasubo gumikan kay wala sila nakaapil sa pagsang-at og kaso ug ang mando sa korte mao ang pagbayad lamang sa mga complainant.
Bisan nalipay ang pipila sa hukom sa korte, nagmasulob-on gihapon ang kadaghanan sa mga naka-invest niini human subling napukaw sa ilang panumdoman ang nahitabo kanila niadtong tuig 2019 ug nadugangan pa kini sa mga damyos sa nahitabong linog.
Kahinumdoman nga mitanyag ang Rigen Marketing og 400 porsiyento nga interes sa matag kapital nga i-deposito sa ilang mga investors mao nga daghan ang nahaylo niini. (Orlando B. Dinoy)