WALAY natala nga naangol nga mga residente sa Davao City ug bisan sa mga kasikbit nga lugar sa Davao Region sa pagtay-og sa 7.1-magnitude nga linog alas 8:23 sa gabii, Enero 21, 2021.
Sa ulahing pagpanubay sa awtoridad sa dakbayan sa Davao sa tanang mga overpass, ang Matina Crossing lamang ang nakitaan og pagliki ug gilayong kining gikordon.
Sumala sa Talomo Police Station, pinaagi sa opisyal nga si Police Lieutenant Rizalito Clapiz III, nga ginatan-aw na sa usa ka ahensiya ang giingong dugay na sab nga overpass kung gub-on na lang ba o ayuhon.
Samtang nakitaan sab og liki ang pipila ka parte sa school building sa Daniel R. Aguinaldo National High School diin dali sab nga giaksiyonan sa City Engineer's Office (CEO).
Ang linog miigo sa mga siyudad ug probinsiya ning rehiyon diin ang sentro mao ang Jose Abad Santos, Davao Occidental nga dunay gilawmong 116 kilometros diin ang lokasyon 04.92 (Norte) 127.44 (Sidlakan) - 231 km (Habagatan) 61° (Sidlakan) sa JAS.
Nabatyagan sab ang pagtay-og nga Intensity V sa City of General Santos, Intensity IV sa Davao City ug Intensity II sa City of Bislig, Surigao del Sur ug mga silingan nga dapit.
Wala sa'y gikatahong tsunami alert sa maong linog suma sa Philippine Institute of Volcanology and Seismology.