GIDOBLE sa Japan ang ilang paninguha kabahin sa ilang pag-host sa 2021 Tokyo Olympics ug gipanghimakak niini ang taho nga posibleng hingpit na nga makanselar ang kompetisyon tungod sa padayong hulga sa Covid-19 pandemic sa tibuok kalibutan.
Bisan gipaubos na man tuod ang Japan sa state of emergency tungod sa ikatulong pagbanlas sa Covid-19, ang Tokyo Games organizers misaad nga ipadayon nila ang pagpahigayon sa kompetisyon sugod karong Hulyo 23, 2021.
Ang kompetisyon orihinal nga gikatakda sa miaging tuig apan nauswag kini tungod sa pandemic.
Ning bag-uhay lang, adunay taho ang The Times nga nakadesisyon na ang gobiyerno sa Japan nga kanselahon ang kompetisyon apan hugtanon kining gipanghimakak sa games organizers.
"We will clearly deny the report," matod ni Deputy Chief Cabinet Secretary Manabu Sakai. (AP)