GUMIKAN sa padayong pagpanghulga sa Covid-19 pandemic, ang Philippine Basketball Association (PBA) nakadesisyon nga mogamit og "act of God" clause sa tanang kontrata sa tanang mga magduduwa.
Ang board of governors ningpasa na og resulosyon sa pagsukip og "act of God" clauses sa tanang Uniform Player's Contracts (UPCs) nga pirmahan sa mga magduduwa sugod sa sunod nga season.
Sa legal nga termino, ang "act of God" nagtumbok sa natural nga kalamidad diin wala'y tawo nga mapasanginlan.
Sa "act of God" clause, ang team owners adunay katungod sa pag-usab sa unod sa kontrata lakip na ang suweldo sa mga magduduwa depende sa sitwasyon.
Nakadesisyon ang board niini human sa malisod nga nasinati sa liga sa miaging season diin usa ra ka duwa ang napahigayon sa tuig 2020 gumikan sa grabeng pagkuyanap sa Covid-19.
Nakabalik man tuod ang aksyon sa liga sa miaging season apan imbes tulo, usa ra ka komperensiya ang nahuman unya gipaagi pa kini sa bubble concept nga nakatay-og sa pinansyal sa matag team.
Taliwala sa dakong problema nga hatod sa Covid-19, ang tanang teams naghatag gihapon og saktong suweldo sa ilang mga magduduwa basi sa nakasaad sa kontrata.
Ning higayuna, gipasabot sa board nga bug-at na kaayo sa bulsa sa team owners kon magpadayon ang pagpanghasol sa Covid-19.
Giklaro sa PBA officials sa pagpangulo ni Commissioner Willie Marcial nga makiangayon ang pagtrato sa team owners ngadto sa mga magduduwa kabahin sa pagpatuman sa "act of God" clause. (ESL)