Teen romance: Crying in the rain (Ikalima sa pito ka mga gula)

MORA kog nawad-an og kusog human sa among gibuhat ni Andro. Sa akong pamatyag, morag gikan ko sa grabeng kalipay nga sukad karon pa nako naangkon. Gipaningot mi si Andro. Nauwaw ko niya. Nagdali kong nag-ilis sa akong sinina. Nag-ilis na sab si Andro.

"I'm sorry, Nova. Nadala ko sa akong emosyon. Nagkinahanglan kog kasandigan sa akong mga kaguol."

"Ug ako ang napahungawan mo ani, Andro?"

Napaak ko ang akong ubos nga ngabil ug nakahilak gyud ko. Kalit kaayo ang nahitabo namo ni Andro. Nahatag ko niya ang akong lawas nga ingon lang niadto kadali. Wa gyud ko makasupak niya dihang iya nang gihubo ang akong gisul-ob nga sayal ug tisirt.

Apan ipokrita ko kon di ko moangkon nga nakagusto sab kaayo ko sa among ibuhat.

Wa koy tingog nga mibiya sa ilang Andro. Naguol gyud kaayo ko. Nauwaw ko sa akong kaugalingon. Unsa kahay pagtuo karon ni Andro nako? Nagtuo gyud tingali siya nga humok kog ilong, nga bisag wa mi relasyon gihatag ko niya ang akong lawas.

Nakahibawo ko nga love gyud niya si Shierel.

Walking distance lang ang ilang balay ni Andro sa among balay. Naglakaw lang ko. Nagsige kog pamahid sa akong mga mata. Naghilak gihapon ko. Sa hilom nakapangutana ko sa akong kaugalingon kon unsa ba gyud ang tinuod kong pagbati ngadto kang Andro? Friendship ba lang o nahigugma ko niya? Nganong dali ra man nakong gihatag ngadto niya ang akong lawas?

Naglikay na ko kang Andro sa misunod nga mga adlaw. Bisan naangkon na niya ang akong lawas apan angay ko lang gyud siyang likayan. Di na ko gusto nga mausab pa ang nahitabo namo. Unya paglabay sa usa ka buwan kapin, gipanid-an ko ang akong kaugalingon. Nahadlok man gud ko nga mabuntis. Ug labihan nakong lipaya kay giabtan ko sa akong binulan nga sakit.

Wa ko momabdos.

Usa ka hapon ana, nakita ko sila si Andro ug Shierel nga malipayong nag-holding hands samtang naglakaw sa sidewalk. Nagselos ko.

(Sumpayan)