HUMAN gilugakan, nibalik na sab ang estriktong pagpatuman sa health protocol taliwala sa pagsaka sa mga kaso sa Covid-19 sa dakbayan sa Sugbo. Resulta, daghan ang nadakpan sa mga pulis nga gisangonan pagpatrolya sa mga sityo diha sa kabarangayan.
Ang wala makasabot sa ilang trabaho padayong nagpabadlong. Ang mga nakasabot ug nibati kong unsa ka mangtas kining maong virus nagpuyo sa balay.
Kining mga pulis nga nagbadhas badhas sa kadalanan, eskina ug mga interior nga bahin angay untang pasalamatan tungod sa ilang pagsugal sa ilang tagsa tagsa ka kinabuhi aron kita mapanalipdan batok sa coronavirus disease 2019 (Covid-19).
Pero inay hangpon, ang gibuhat sa uban gipangkasab-an hinuon ang mga pulis. Nagtagawtaw ngano nga sila badlongon. Inay dalitan og mga pahiyom ug mainom nga tubig, naunsa ba nga nangisog man hinuon si manang. Ang pasangil ss uban nga napagan sa pagpatuman sa curfew, sama sa mga naninda og pagkaon, way ayo ang mga pulis kay hounhan sila og kasaba.
Gisulayan og sakmit ang ilang mga baligya, lamisa ug lingkoranan. Pastilang gubota. Bitaw matawag nato nga isolated ra ang maong mga panghitabo. Pero sa pagka tinuod lang kitang tanan ma pulis, estambay, manindahay ug bisan unsa pay ranggo nimo sa katilingban way gusto nga ma-Covid. Sigurado ta ana.
Kanang mga pulis unta mangita ra sa mga durugista, kriminal ug ubang badlongon sa katilingban. Pero tungod sa pandemya nadungagan ang ilang trabaho biniyaan ang ilang mga pamilya.
Pangutan-a nang mga pulis nga gikan sa Bohol, Siquijor ug Negros Oriental nga nalakip sa augmentation sa pagsugod sa pandemya. Subra na sa napulo ka bulan nga wala na nila igkita ang ilang pamilya. Kutob nalang sa text, tawag ug Facebook. Pagkapait. Balik ta sa kalarankas sa mga sitio atol sa patrolya.
Akong sugyot nga sa dili pa moabiso pinaagi sa siren unta nakapanghipos na ang tanan sama sa mga manindahay. May pulis o wala ingon ani na unta ang mahitabo pagsiguro nga way kabubut-on nga masilo.
Sa habig sa mga pulis gilaoman nga tukmang kortesiya ug diplomasiya nga pag-implementar sa mga health protocols. Sa kabahin sa mga nakalapas, pagpaubos ug pagpangayo og dispensa ang angay nga mopatigbabaw. Magsinabtanay lang gud kay para man ni sa kaayohan natong tanan.
Way gusto og lockdown sigurado ko ana.Kinsa bay ganahan nga tanggongon ka sa imong balay unya ang ayuda puwerteng dugaya ug sa makadaghang higayon gipili ra ang gipanghatagan ni Kapitan. Kung gihatagan man gani, ang mga duol sa luwag nagpas-an sa bugas nga ganador.
Ang uban, bugas nga wa-il (wa ilhi) maoy nadawat. Sagdi lang pulong pa sa uban kay kining madaugdaugon panahon sa Covid, makatilaw unya og makabungog nga zero kung managan ni sila sa eleksiyon sa 2022. Panahon nga makabawos.