NAPILI nga mayor ang usa ka iro ug usa ka kanding sa usa ka komunidad sa Vermont sa Estados Unidos aron makatabang sa pagtigom og kwarta sa pagpaayo sa playground sa dapit.
Ang town manager maoy naka-idea nga mopili og hayop isip mayor aron makapondo sa pagpaayo sa playground aron makatabang sa mga bata sa dapit.
Matod ni Joe Gunter, town manager, ngadto sa Rutland Herald nga niadtong 2018, ang mga lumolupyo sa Fair Haven nipili sa kanding nga si Lincoln isip mayor. Si Lincoln nakatigom og $10,000 (P480,000) niadto.
Ang mayor nga si Murfee, usa ka cavalier King Charles spaniel nga iro, nakatigum og di mominos $20,000 (P961,000). Nipuno sab og laing $20,000 ang kagamhanan sa dapit.
Ang tag-iya ni Murfee nga si Linda Barker nagkanayon nga ang pagpamolitika ni Murfee pinaagi sa pagpamaligya og t-shirt sayon ra hangtod nga naabot ang pandemiya.
Kini maoy hinungdan nga nibalhin siya sa pagpamaligya og maskara diin halos 1,000 na iyang nahimo og naduna pay laing batch alang sa Valentine's Day.
Kapin sa $5,000 ang nahalin niya sa maskara ug samang kantidad gikan sa basket raffles.
Apan bisan nga honorary mayor si Murfee apan di kini pwede makaduwa sa playground sanglid duna man kini "no dogs allowed" nga sign.
"Murfee is going to take that up with the town. He's going to contest that," matod ni Barker niadtong Enero 17 samtang niagik-ik. (AP)