GIKINAHANGLANG adunay business permit ug updated ang bayad sa puwesto sa mga vendor sa Lapu-Lapu City Public Market sa dili pa sila makabalhin sa gi-renovate nga building sa maong merkado.
Mao kini ang nahisgutan sa pagkigtabo ni Mayor Junard Chan ngadto sa mga textile vendor sa pampublikong merkado Biyernes sa buntag, Enero 22, 2021 sa City Council Hall.
Gibutyag ni Chan nga sa 63 ka textile vendors anaa ra sa 15 ang updated sa bayad sa puwesto nga nagkantidad og P200.
"Before sila ma-transfer sa bag-o nilang lugar, kinahanglan up-to-date sila sa ilang payment sa ilang monthly rental. Ikaduha kinahanglan naa silay business permit," matod ni Chan.
Atol sa public forum sa maong panagtagbo, nihangyo ang mga vendor nga tugotan sila nga magpabilin sa ilang kasamtangang puwesto samtang gihinayhinayan nila og human ang mga pending nga bayrunon.
Gitubag ni Chan ang maong hangyo ug iyang gihatagan ang mga vendor og panahon aron makabayad bag-o sila mobalhin sa ikaduhang andana sa gi-renovate nga building.
Sa laing bahin, gibutyag ni Chan nga dunay ipahigayon nga public hearing alang sa pag-usab sa binuwan nga abang sa merkado. "Kana nga rental fee nga P200 old na kaayo na siya that was 1960s pa nga ordinance," matod ni Chan. (NDT)