NAPATAY sa kapulisan sa alas 10 pasado sa gabii, Enero 23, 2021 ang gikatahapang drug pusher nga nakaeskapo samtang gi-hospital arrest og pipila ka mga semana.
Ang suspek nga si Mark Muralde, 41, taga T. Cavan Street, Barangay Pasil, Dakbayan sa Sugbo didto na maabti sa kapulisan sa sityo Magsa-obay, Barangay Maya, Dakbayan sa Sugbo.
Si Muralde nakapuga samtang nagtubag sa sugod sa lawas ang pulis nga nagbantay kaniya sa kaadlawon sa Enero 21, 2021 sa Cebu City Medical Center (CCMC).
Human masayri ni Cebu City police chief Colonel Josefino Ligan ang pagpuga ni Muralde, iya dayong gipaalerto ang tanang mga police station sa siyudad, apan nakagawas na sa Cebu City ang pugante.
Ang mga sakop sa Sawang Calero Police Station nakadawat og impormasyon nga si Muralde dunay ig-agaw nga taga Daanbantayan ug nga toa kini nipaingon.
Daling niadto ang team sa mga pulis sa Sawang Calero Police Station ug nakig-coordinate sila sa Daanbantayan Police Station nga gipangulohan ni Police Captain Ian Macatangay.
Si Macatangay nga nahinabi sa Superbalita Cebu nibutyag nga gawas sa mga sakop sa Sawang Calero Police Station, kuyog usab nila ang 701st Maneuver Company gikan sa Regional Mobile Force Battalion (RMFB)-7.
Matod ni Macatangay nga ila unang gipanid-an ang dapit sugod sa human sa paniudto sa Huwebes.
Nihimo usab sila og pakisusi sa mga silingan lakip na ang opisyal sa Barangay Maya hangtud nga kompirmado ang presensiya ni Muralde kuyog sa iyang kapuyo.
Dugang ni Macatangay nga giplano nila ang pag-adto sa gipuy-an ni Muralde.
Sa ilang pag-abot, giingong nakabantay si Muralde sa mga pulis ug giingong gipamusil sila hinungdan nga nahitabo ang pinusilay.
Si Muralde naigo sa ulo ug dughan namatay diha-diha samtang way naunsa sa mga pulis.
Ang Scene of Crime Operation (Soco) team nakarekober og .357 caliber revolver ug duha ka mga kabhang sa bala.
Nadakpan
Samtang si Police Major Eduard Sanchez, hepe sa Sawang Calero Police Station, nibutyag nga si Muralde nadakpan niadtong Disyembre 16, 2020 sa ilang raid sa Barangay Pasil.
Ilang gi-raid ang balay ni Muralde pinasikad sa search warrant nga gi isyu ni Judge Jose Nathaniel Andal sa Branch 24 sa Cebu City Regional Trial Court (RTC).
Si Muralde gipusasan dayon human nga makuhai og upat ka mga medium pack sa shabu sa gikatulogan niining kwarto.
Samtang gibilanggo sa Sawang Calero Police Station, siya giingong giatake sa kasingkasing. Gidala si Muralde sa CCMC aron ipasusi sa doktor ang iyang kahimtang.
"Wala na kabalik sa iyang selda kay mi-recommend na man ang iyang doktor nga kinahanglan gyud i-admit ang piniriso.Gitugotan siya pero ato pud nang gipananghid sa atong city director kon pwede ba. Mao nang naka hospital arrest siya", butyag ni Sanchez.
Dugang ni Sanchez nga tungod kay tulo na ka semana si Muralde sa ospital, iyang gimanduan ang pulis nga maoy iyang gipabantay kang Muralde nga pakig-estoryahan ang doktor nga miatiman nga mangayo na og pagtugot nga kinahanglan nang ibalik si Muralde sa selda.