PAMPANGA

Garcia: Matatag a pamagpasya at tagumpe (firm determination and success)

Kapisik

“Nwan ya ing magpilit lalam ning panyubuk uling,

kaybat nang telakaran ing kasuryan,ing taung ita tanggapan ne ing putung ning bye

a penagku ning Ginu karing lulugud Kaya.”

~ Santyagu|Dangka 1:Sunis 12

(James 1:12)

“E magkulang king kasigasigan, dapot panatilyan ing sasal ning diwa, susuyu king Ginu.

Tumula king pagasa, mapibabata king sakit, manalig king pangadi.”

~ Ding Romanu|Dangka 12:Sunis 11-12

(Romans 12:11-12)

“E yu sukat labanan ing lumpungan ayni.

Magbili kayu karing dane yu; tikdo kayung matatag at akit ing pamangabus

a pagkalub ning ning Ginu, Yudea, Yerusalem.

E kayu tatakut; e kayu paysira lub..

Luwal kayu at arapan ing bukas, at ing Ginu ume Ya kekayu.”

~ Kadwang Aklat ding Pamitala, Dangka 20:Sunis 17

(2 Chronicles 20:17)

“King kapagnasang ayni alang mababating o mababawas,

at ing ditak a panyulung king dalang ayni apangilag ne ninu man

king pekamapanganib a uri ning takut.

“Ding ati king dalan ayni masikanan la lub king kasangkanan da, at ing pigampa da metung. O anak a makamal ding Kuru, ing kabyasnan ding mayna lub dakal ya tangke. ”

~Dalit ning kakataskatasang Panginwan, Dangka 2: Sunis 40-41

“O anak nang Parta, ing kalawsang lub ayta e masisira,

a palambatan ning katatagan pauli ning pamag-yoga, at inya sa’t ampatan no ring isip, bye,

at kimut ding panamdam, ati king paralan ning kayapan.”

~Dalit ning kakataskatasang Panginwan, Dangka 18, Sunis 33.

***

ATIN mipalage ibat king Japan kanitang mapilang banwa na at linto ya anting metung kareng memories ning Kapisik nakadwa at ing ulaga na dikil king bye tamu ninu man itamu lalung sinlag para king kasalunsungan. Iti papakit ne ing metung a anak a manga apat o limang banwa mu a metung karing talapagaral a linaban king metung a ligligan king pamaglugsu at pamaglagpas king metung a barrier o sumbagal a matas. High-jumping competition ya.

Ing anak ayti linugsu ya mu mekatatlu at karing pamaglundag na e ne alagpusan ing sumbagal at balang malilyari ita mangapakyak ya dapot e ya pa mu rin sinuku. Akakit king lupa na ing kapagnasang magpursigi. Deng kalupa nang talapagaral gugulisak la keng salitang Nipponggo dapot agyang e ta balu kabaldugan ing gugulyo da—malino ing pasiknangan de lub. E de pagsisti.

Ing anak linugsu yang pasibayu dapot e ne poa mu rin alagpusan ing sumbagal. Lakwas yang ginaga’t ginalanggang dapot e ya pa mu rin sinuku. Melunus la ata ding kaklasi na inya ating metung karela ing menagkat karing abe na bang palibutnan deng pabilug ing anak a makiligligan. Inyang pakapalibut no kaya kilung de karing katawan da’t misusuglung-suglung lang anting tanikala–atin lang pibulung-bulungan at kaybat ginulisak lang balamu sasabyan da–“Alang susuku, agyu mu yan!”

King pasibayung pamagpumilit nang alagpusan ne ing sumbagal ning anak daig ne pa ing usang linundag asna katas at king penandit ayta alagpusan na ne ing barrier at migtagumpe ya at ding sablang manalbe memanikdo la at pinalakpak la ngan para kaya neng e ya sinuku bang dasan na ing tagumpe.

Makanyan man, agyang pepasiknangan de lub deng kaklasi na, at yu pa mu rin ita king kapagpursigyan nang magtagumpe. Kasi agyang mabilug a yatu la reng magpasikan lub kaya–nung e masikan ing kapagnasan nang magtagumpe–e pa mu rin magtagumpe.

King bye tamu antita mu naman ing kaylangan. Matatag, masikan at e susukung pasya bang dasan ing pakikwanang tagumpe king nanu mang dake ning bye tamu—lakwas na king pamisuglung king Apung Ginu. Ing kapagnasan tamu maragul at mauglaga yang sangkap ning pamagtagumpe ba’ta’ng akwa ing parasan tamu anting talasuyu ning Apung Ginu.

Sukat tamung pagnasan at pakikwanang alang pamanyuku ing dasan tamu ing pamanyuyung dalise king Ibpang Kakataskatasan. Mibagsak tamu man, misakab at misubsub keng burak magpumilit ta pa mu rin dapat tikdo, sumulung at lumapit Kaya nu man iti kasakit at agya man alang magpasikan lub kekatamu.

Magdili-dili tamung muli king Keyang kayaryan. E tamu payna lub, e ta mumurung nung e sukat tamung sumulung agyang nanu pa ing malyari. Ambisna metung ya mu ing sasaup kekatamu at ing Nwan a Lagyu e na katamu lakwan agyang kapilan man.

***

PAMITUD: Bukas ya pala ing kayaldawan ning kanakung matalik a kakaluguran–Conrado M. Contreras ning San Francisco, California.

Masayang Aldobeytan kanakung kakaluguran at kumparing tune! Pagkaluban na ka sanang alang-anggang kalam ning Apung Ginu! Hallelujah! Haribol!

***

Dake Talabaldugan:

1. mangkukutod/mangkukutud (palagyu) minunang anitu, dapot bansag da reng aliwa karing manananggal ngeni. English - ancient idol; another term for vampires. Alimbawa king pamangamit: “Lakwas lang kakatakutan ding mangkukutud kesa kareng maglalage uling deti makapanasakit la.”

2. manggá (palagyu) bunga at impun ding tanaman a mamungang manyaman a sisisigan at pagmayumu. English - Mangifera indica, mango. Alimbawa king pamangamit: “Kalalagwan yang bina ing baintau keng paglolwan na agyang kayaske ya kanung mangga lupa ing dalaga.”

3. mangmáng (panguri) mulala, tanga, alang balu, alang pegaralan. English - ignorant, functionally illiterate, uneducated, unlettered, unlearned, unschooled, unable to read and write. Alimbawa king pamangamit: “Agyang mangmang ya ing tau e mangabaldugan a e na na balu ing katuliran inya e la sukat lalatyan.”

***

SADYANG GAWI DA RENG KAPAMPANGAN

Inyang minuna, gawi da ing mandapug deng kabalen tamu. Mamalis nong mamalis keng mula da at titipunan da ngan ing bulung a mangabalag at pati na ing sablang sukal bang itumpuk da. Iti tugtugan dang ditak a laru o gas o reng aliwa metampud a kandila bang apatawan da.

Ing bau ning bulung at dutung a masisilab ing ababau da reng lalabas kanita o siping bale. Ngeni, pane plastic o goma ing darapugan da inya makaragdag pa king sakit ing pamandapug at makasira king kalinisan ning kalikasan.

***

Salamat pung dakal king pamanangkilik keng Kapisik at SunStar Pampanga. Malyari ko pung mag-email keng kek’ong talasulat king garciakragi@yahoo.com, mag-text o maus para karing kutang o munikala: 0942-3924-399 o 0945-3795-270.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph