PANGULOHAN sa kanhi PBA import ang 12-man team sa South Korea kinsa moduwa para sa third window sa 2021 Fiba Asia Cup qualifiers karong Pebrero.
Si Ricardo Ratliffe, kinsa nahimong naturalized player nga adunay Korean name nga Ra Gun-A kinsa ug makaatbang sa Gilas Pilipinas, maoy mangu.
Ang naturalized player sa Korea niduwa sa Jeonju KCC Egis parisan nilang kanhi Phoenix import Lee Gwan Hee sa Seoul Samsung Thunders sa ila unyang pag-ari sa nasod para sa Pebrero 18 ngadto sa 22 nga torneyo.
Makontra sa Korea ang Gilas sa Pebrero 18, Indonesia sa Pebrero 19, Thailand sa Pebrero 20 ug balik silag kontra sa Gilas sa Pebrero 22.
Ang Korea adunay 2-0 nga record sa Group-A human ilang gipilde ang Indonesia 109-76 ug Thailand, 93-86 sa first window niadtong Pebrero, 2020.
Ikauban ni Ratliffe silang Lee Seoung-hyun sa Gorang Orions, Kim Jong-kyu sa Wonju DB Promy, Kang Sang-jae sa Incheon ET Land Elephants, ug 2020 KBL MVP Heo Hoon sa Busan KT Sonicboom.
Ila usab iparada ang ilang batan-ong sentro nga si Yeo Jun-seok gikan sa Yongsan High School nga maoy labing una niyang duwa human siya nahimong MVP sa 2019 Basketball Without Borders.
Mokumpleto sa team si Jeon Junbeom sa Ulsan Hyundai Mobis Phoebus, Kim Nakhyeon sa Incheon ET Land, Byeon Junhyeong sa Anyang KGC, Ah Young-jun Ahn sa Seoul SK Knights ug Kim Si Rae sa Changwon LG.
Ang Korea wala niapil sa second window niadtong November didto sa Manama, Bahrain gumikan sa Covid-19 diin sila gipahamtangan og silot sa Fiba pinaagi sa pagpamulta og P8.6 milyones gumikan sa kapakyas nila pag-apil sa torneyo. (PAC)