Vallena: Sharrow

DAGHAN ang wa makasabot sa bike lanes nga gipamutang sa dagkong kadalanan sa Dakbayan sa Sugbo kay nagtuo ang kadaghanan nga di mahimong maagian og laing sakyanan. Mahimo kaayo ning maagian, apan di mahunongan, unta. Mao ni ang gitawag og sharrow bike lane kun shared bike lanes. Apan prayoridad nga paagion niini mao ang mga nag bike. Gitumong kini alang sa kaluwasan sa mga tawo nga nagsikad sa karsada.

Busa kon ikaw nagmaneho og sakyanan ug dunay nag bike subay sa lane, ayaw siya papadaplina kay moagi ka. Give in kay naa man siya gasubay sa bike lane, wa man sa lane alang sa motorized nga mga sakyanan.

Kon ikaw tigbiseklita, wa usab magpasabot nga makapasagad ka na sa karsada. Isip siklista, kinahanglan nga mosunod ka sa lagda sa trapiko. Kon dunay pedestrian nga molabang, hunong, iyaha ang agianan. Sunod sa balaud sa trapiko, sama sa kon mag stop signal, hunong usab. Kon asa padulong ang dagan sa trapiko, sunda. Ayaw pag counterflow.

Daghan na kaayo ang tigbiseklita nga magpataka lang sa pagpadagan sa karsada. Naa gihapon ang sakit nga sila nagtuo nga maoy tag-iya sa dalan. Di kahibawo ba nga isip tigsikad, ang iyang responsibilidad sama sa mga driver sa motorized nga mga sakyanan.

Kon mogara gud sa karsada samtang magbiseklita, adto ra ni padulong sa aksidente.

AYAW PAGDALI

Kon unsay imong gibuhat, mobalik ra sab ni nimo. Kon motahod ka sa mga tawo nga naa sa karsada, sagad morespeto usab sila nimo. Di hinuon tanan kay duna man guy mga drayber nga gitawag og kamote. Kana bang reckless, kusog nga makapadagan bisan nag-aginod ang dagan sa trapiko. Sagad ani nila mao ang hinungdan sa mga aksidente.

Sama niadtong drayber sa usa ka Toyota nga AUV nga misakdap nako samtang nagsubay ko sa karsada atubangan sa University of San Carlos sa Nasipit, Talamban. Kusog kaayong nakapadagan ang drayber. Nagsige pa og change og lane samtang nagsige og overtake og sakyanan.

Samtang hapit na mi mag-ambas og dagan, nikalit siya og change lane pagsaylo niya sa Country Club. Nagsubay usab sa lane nga iyang gisudlan ang lain nga kamote driver sa motorsiklo. Maayo kaayong pagkabangga. Silang duha nahunong samtang ang drayber sa motor misiyagit sa ka sakit. Paminaw ko, nabali ang tiil.

Ang ilang hinanggaw nibalik ra sab nila.

ROAD RAGE

Usa ka video ang gipasaw-an sa usa ka netizen sa Cebu Road Heroes Facebook page. Nagpakita kini sa usa ka drayber, nga hayan maoy tag-iya, sa usa ka Suzuki Jimny nga 2003 model nga nikalit og hunong.

Nikanaug ang drayber nga nagbitbit og pusil unya giduol ang drayber sa motorsiklo, dayon gidapog. Kinsang buanga ang mosukol sa tawo nga armado? Maayong patagmon tong tawhana, suspensuhon ang lisensya kay abuso man tong iyang gibuhat bisan pag duna siyay permit to carry.

Hinaut pa nga moaksyon ang Land Transportation Office. Tan-awa ang video.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph