Sa niaging Biyernes, pormal na nga gi-introduce ang Kiboy’s Computer Solutions (KCS)-Mandaue City team isip sakop sa bag-ong natukod nga VisMin Super Cup pinaagi sa press conference nga gipahigayon diha sa San Remegio Pensionne Suite sa Mabolo, dakbayan sa Sugbo.
Actually kining KCS team nga gipanag-iya sa batan-ong negusyante nga si Ricky Verdida, sukad pa sa pagsugod paghulma sa VisMin Cup, maoy unang team nga mikomiter gilayon sa lega nga wa gyud mopakita og paglubad.
Nagpabiling hugot ang iyang pagsuporta sa maong lega nga mao na unyay pinakadako nga torneyo sa Kabisay-an ug Mindanao.
Sa press conference, gipasabot ni Verdida nga usa sa iyang katuyoan sa pagsalmot ning legaha mao ang pag-promote sa iyang gamayng negusyo.
Ang pamilyang Verdida adunay trading business sa computer.
Niadto lang Nobiyembre sa niaging tuig nagsugod siya sa pagtukod og basketball team nga gilangkuban sa mga batan-ong magduduwa.
Ang iyang pagkahilig sa duwang basketball maoy nagtukmod kaniya nga makaporma og team.
Unang misalmot ang KCS team sa Cebu City Mayor Edgar Labella Cup basketball tournament diin sila niabot sa finals.
“Tigduwa man gyud kog basketball sa una pa. Kuyog ko permi og mga varsity players,” matod ni Verdida.
Apan gawas sa exposure sa iyang kompaniya, kalipay usab ni Verdida nga makatabang sa mga players ilabi na ning panahon sa pandemya.
Gani bisan og walay mga tournament ning panahona, apan anaa permi iyang gikakuyog ug gikahugoyhugoy ang pipila sa iyang mga players.
“Ganahan lang gyud ko ug ganahan sab sila sa among bonding,” matod ni Verdida kinsa gamay pa nga gibiyaan sa iyang inahan ug didto na nagdako sa iyang lolo ug lola didto sa lungsod sa Medellin.
Sa mga pinansiyal nga yangongo, si Verdida dili magpanuko kon unsay anaa nga iyang ikaabag.
Kalabot sa umaabot nga VisMin Super Cup, sayod si Verdida kon unsa kalig-on ang sagubangon sa iyang team.
Apan uban sa iyang coach nga si Mike Reyes, siya masaligon nga makahatag sila og kombati sa maong torneyo nga gikatakdang sugdan sa Abril 9 ubos sa usa ka bubble set-up nga pagpahigayon aron pagsunod sa health protocols nga gilagda sa gobiyerno.
“It’s a tough challenge but we will try our very best and work hard. Makakombati man sab ni atong mga batan-on,” ni Verdida pa.
Inabagan sa ilang team manager nga si Ritchie Cesa, ang KCS-Mandaue City team pagabituonan sa mga kanhi SWU-Phinma standouts nga pinangulohan nila ni Joseph Nalos, Bernie Brigondo, Shaq Imperial ug Dyll Roncal.
Anaa usab kanila si si Enrico Llanto, Alfred Batino, Gileant Delator, Vincent Menguito, Phil Mercader, Monic Soliva ug Raffy Oktubre.
Sa niaging semana, ang ARQ Builders-Lapu-lapu City Heroes nga gipanag-iya ni Jason Arquisola pormal usab nga milusad sa ilang partisipasyon sa lega.
Laing mikompirmar sa ilang partisipasyon mao ang MJAS Zenith sa team owner nga si Samson Lato ug team manager John Santos. Kini gisuportahan usab sa Puma Philippines nga gipangulohan ni Michael Aldover, ang Philippine Senior Manager for Sales, Marketing and Operations.
Gawas sa mga nahisgutan sa unahan, daghan pa karong mga teams nga nakigsabotsabot pa sa mga nagpasiugda sa maong lega nga sa pagkakaron mao nay nahimong talk of the town.(jun.migallen22@gmail.com)