Mongaya: Nalingaw sa isyu sa UP

DAGHAN kaayong mga giingong wokes nga naningog karon depensa sa University of the Philippines (UP). Kini human giundang ni Sec. Delfin Lorenzana ang kasabutan sa UP ug ang Department of National Defense (DND) nga mananghid pa sa administrasyon sa unibersidad kon mosulod ang kapulisan.

Giingon nga gibuhat kini aron maundang ang pagpangrekrut sa mga komunista ug NPA og mga tinun-an sa maong tunghaan.

Ngilngig pa kaayo kay atong nabasahan kining balita nga ang mga sundawo gimandoan nga modapig sa gibuhat ni Lorenzana.

Wa lang ko makasabot nganong karon sila mangitag mga rebelde sa maong tunghaan. Ngano? Kay tungod sa pandemya, nag-online classes ang mga tinun-an. Busa, ang mga titser ug ilang tinun-an wala sulod sa campus. Naa ra sa ilang kabalayan.

Wa buhata kadtong wa pay Covid. Wa sab makahulat nga maundang ang Covid.

Mao nga nagduda ko nga kining gibuhat ni Lorenzana apil ni sa paglipat sa katawhan sa pagtuki niining isyo kabahin sa bakuna.

Kontrobersyal man gud kining bakuna kay mao kiniy saad ni Presidente Rodrigo Duterte nga sulbad sa pandemya diin moabot na og kapin sa 10 mil ang nangamatay. Matod pa niya mga usa ka semana human sa iyang Sona sa miaging tuig, masulbad na kini inig tapos sa tuig.

Apan unsa may nahitabo pag-Disyembre? Nagpabakuna na ang mga tawo sa pipila ka nasud apan ang Pilipinas wa pay klarong na-order.

Bisan pa man, si Presidente Duterte mismo niangkon nga nakapabakuna na ang mga sundawo ug ang Presidential Security Group (PSG). Nasayran nga kining maong mga bakuna smuggled diay ug walay approval sa Food and Drug Administration (FDA).

Niguwa pa gyud ang balita nga nakapabakuna sab ang mga Insek nga naa sa mga Pogo.

Karon, human sa hearing sa Senado kabahin sa Senado, nasayran nga kining gi-order sa administrasyon nga Sinovac gipatas-an og presyo sa Department of Health (DOH) mismo ug nabonggo ang administrasyon kay barato kaayo sa ubang mga nasud.

Dayon, naa pa gyud kining mga istorya nga ang Pilipinas naay 300 percent nga discount? Unsaon pag-compute to ana? Wa may klarong tubag ang administrasyon.

Dinhi sa Sugbo, mas maulahi pa gyud kita. Kay samtang nag-iyahay na og order og lain-laing brand sa bakuna ang ubang mga syudad, wa pa kitay klarong balita kon naka-order na ba si Mayor Edgar Labella. Samtang si Gob. Gwen Garcia niingon nga ‘premature’ pa nga mo-order.

Alang kanako, mas kontrobersyal kining kabahin sa bakuna kay sa UP. Apan mas daghan karon ang naghisgot sa UP. Ang wa lang damha sa administrasyon kay bisan ang dili woke nga taga UP, nasuko na sab nganong hilabtan gyud ang ilang unibersidad. (@anol_cebu sa Twitter)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph