MAKUYAWAN kang magtan-aw karon sa mga kaso sa coronavirus disease sa Dakbayan sa Sugbo kay nag-average na kini og 40 ka mga infection matag adlaw. Sa Enero 22, niabot og 50 kapin ang bag-ong aktibong mga kaso sa Covid-19.
Apan alang kang Visayas Inter-Agency Task Force deputy chief implementer retired Major Melquiades Feliciano, di kini ikahibung kay maoy trend usab sa ubang mga dapit sa nasod. Tungod kuno ni sa holidays diin grabe ang lihok sa mga tawo.
Bisan tuod kon normal kini sa iyang pagtan-aw kay maoy ilang gipaabot, ang pagsaka sa mga kaso lisod nga ipadaplin bisan kon ilang gipaabot nga mohinay kini sa Pebrero o di ba sa hinapos sa Enero.
Busa di mabasol ang Siyudad sa Sugbo ug kapulisan nga gihigpit ang pagpatuman sa curfew nga bisan gani mga doktor, nga authorized person outside residence (Apor), gipangdakop, gidala sa gym aron i-process ug gipamulta og P500 matag usa.
Kay kon tinambanon ang sulti sa mga awtoridad, klaro kaayo nga sa panagtapok nakuha ang virus. Bisan si Konsehal Joel Garganera, deputy chief implementer sa Cebu City Emergency Operations Center, niingon nga kasagaran sa mga pagpanakod nagagumikan sa panagtapok.
Usa mga gibantayan og maayo sa mga pulis mao ang panag-inom. Sagad sa mga inom, labina sa daplin sa dalan ug interior sa mga barangay, magtagay, pasahay sa baso. Kana, bisan usa lang ang gi-Covid, daghan na ang maangin. Sama ni sa nahitabo sa usa ka sityo sa Barangay Luz sa miaging tuig. Usa lang ang gi-Covid, nikatap dayon ang kagaw.
Kon nag-inistrikto man ang kagamhanan sa pagpatuman sa curfew ug mga health protocol, ayaw kasuko tungod kay ikaw ang gipanalipdan aron di ka mataptan. Di lalim ma-Covid. Kay mogasto ang gobiyerno matag kaso. Unya mosamot pa og kaut-ot ang ekonomiya.