WAY piyansa nga gitakda sa korte sa usa ka 17 anyos nga menor de edad nga taga bukirang barangay sa Siyudad sa Sugbo sa kasong rape nga iyang giatubang.
Ang menor nga si Bulay (di tinuod niyang ngan) gipasakaan og rape sa giingong paglugos niya sa usa ka 8 anyos nga ig-agaw.
Si Bulay nasikop sa mga operatiba sa City Intelligence Unit sa Cebu City Police Office (CIU,CCPO) sa Biyernes sa udto, Enero 22, 2021.
Ang lugar diin nahitabo ang rape gipapugngan sa kapulisan.
Si Police Lieutenant Colonel Randy Caballes, pangu sa CIU, maoy nangu sa pagdakop kang Bulay bitbit ang warrant of arrest nga giisyu sa korte sa kaso nga kalapasan sa Akta Republika 8353 kun Anti-Rape Law nga may kalabutan sa Akta Republika 7610 kun Special Protection of Children Against Abuse, Exploitation and Discrimination Act.
Matod ni Caballes nga ang giingong paglugos nahitabo niadtong Hunyo 2020 sulod sa balay sa suspek.
Way tawo sa balay niadtong higayuna kay ang mga ginikanan nanarbaho.
Ang bata nisumbong ngadto sa iyang inahan pipila pa ka mga adlaw human sa gibuhat ni Bulay kaniya.
Human masayod ang inahan, nisumbong gilayon siya kapulisan. Tungod kay nilapas na man sa reglamentary period, gipasaka ang kaso samtang gawasnon si Bulay.
Tungod kay menor, siya gitugyan nila ni Caballes sa Operation Second Change, pasilidad sa Dakbayan sa Sugbo diin ang mga menor nga nakahimog salaud ibutang, samtang magpadayon ang hearing sa kaso. (BBT)