SUPERBALITA CEBU

Singco: ayaw una og bisita sa Ginatilan

LIKAYI: Si Ginatilan Mayor Michael Dean Singco miawhag sa mga tawo nga gustong mobisita sa lungsod sa di una pagdayon. / gikan sa FB page ni Mayor Singco

GIAWHAG sa kagamhanan sa lungsod sa Ginatilan ang mga dumuduong sa ilang lungsod nga kon mahimo likayan lang una kini sa mosunod 14 ka mga adlaw.

Kini samtang nagpadayon pa sila sa ilang contact tracing sa kalit nga pagsaka sa mga kaso sa coronavirus disease (Covid-19).

Matod ni Mayor Dean Michael Singco nga sa uwahing talaan sa lungsod sa Enero 23, moabot na sa 23 ka aktibong kaso ang natala sa ilang lungsod.

Posible pa kini nga mosaka depende sa resulta sa mga pending nga resulta sa mga close contact sa mga nagpositibo.

Kadaghanan sa nagpositibo mga emergency responder sa lungsod, sakop sa Bureau of Fire Protection (BFP), empleyado sa munisipyo ug 13 ka mga binilanggo sa Ginatilan Police Station.

Gumikan niini, isunod usab pagpaubos og swab ang kapulisan sa lungsod.

Temporaryo unang gisuspenso ang tanang mga transaction sa lungsod aron kalikayan ang pagtakod-takod sa Covid-19 samtang nagpadayon ang contact tracing sukad pa sa miaging semana, sumala sa mayor.

“Mga responder gyud nato ang naigo mao apektado ta kay way makaresponde. While kanang mga piniriso naay usa gihilantan mao gi-swab sila tanan 15 ka buok. 13 ang nag-positive unya nauwahi man na og abot ang result sa usa ka priso, nakahalobilo na sila sa kato duha nga wala mag positive mao e-swab nasad to sila,” pagpasabot ni Singco.

Giawhag karon sa mayor ang mga Ginatilanon nga likayan lang una ang pagtambong sa mga birthday, kasal ug uban pang tapok-tapok nga di importante sa mosunod 14 ka adlaw aron kalikayan ang pagsaka pa sa kaso.

Kinahanglan usab nga motamod sa minimum health protocol sama sa pagsul-ob og facemask, face shield ug pag obserbar sa physical ug social distancing kon ugaling di kalikayan nga mogawas sa tagsa-tagsa ka mga balay. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph