ADUNAY duha ka mga manguliay nga Oponganon kun returning overseas Filipino workers (OFW) nga nagpositibo sa coronavirus disease (Covid-19).
Kini ang gikompirmar ni Grace Mary Carungay, city epidemiological and surveillance unit officer sa dakbayan dihang nahinabi ning mantalaan.
Matod sa opisyal nga ang duha gikan sa Dubai, United Arab Emirates (UAE) ug Sri Lanka.
Miabot sila sa dakbayan niadtong Enero 13 ug Enero 15.
Ang 42-anyos nga lalake gikan sa Sri Lanka samtang ang 29-anyos nga babaye gikan sa Dubai.
Apan giklaro ni Carungay nga dili sila suspek sa UK variant sa Covid-19 bisan kon gikan sila sa nasod nga nalakip sa 35 ka dapit nga gibantayan sa kagamhanan gumikan kay adunay UK variant sa Covid-19.
Kini gumikan kay ang cycle threshold CT level sa duha ka nagpositibo wa masulod sa criteria nga gibasehan sa Department of Health (DOH) alang sa posibleng kaso sa UK variant.
Gibutyag usab ni Carungay nga ang duha nga negatibo sa Covid-19 pag-abot nila sa tugpahanan sa dakbayan.
Apan gumikan sa protocol nga ilang gisubay kalabot sa manguliay gikan sa gawas sa nasod, gipaubos sila sa quarantine sulod sa lima ka adlaw ug subli nga gi-swab diin didto na sila nag positibo.
“Ang ilang level above 30 man gud. So, pasabot dili na sila infectious. Ang kaning usa, seaman, gikan sa Sri Lanka. Manila ni siya nitugpa una naabot diri sa atoa. Samtang ang kani gikan sa Dubai direct gyud ni siya niabot (sa Mactan),” pagpasabot ni Carungay.
Gumikan kay nagpositibo man sila sa Covid-19, hayan di sila makauli sa ilang balay samtang di mahuman ang 14 ka adlaw nga quarantine sa ilang pasilidad.
Nasayran nga nga kon ang usa ka manguliay nga Pinoy nga mag negatibo human sa ikalimang adlaw nga pag quarantine gikan sa pag-abot, mahimo na siyang adto mopadayon sa quarantine sa iyang pinuy-anan.